لندن: پاکستان تحریک انصاف کے رہنما سلمان اکرم راجا نے واضح کیا ہے کہ انہیں اسٹیبلشمنٹ سے کسی بھی قسم کے مذاکرات کا علم نہیں، اور سینیٹر اعجاز چوہدری کی ضمانت قانون کے تقاضوں کے مطابق ہوئی ہے۔
لندن میں میڈیا سے گفتگو کرتے ہوئے سلمان اکرم راجا نے کہا کہ پارٹی چیئرمین عمران خان کے خلاف مقدمات میں کوئی حقیقت نہیں، اور وہ کسی بھی ڈیل کا حصہ نہیں بن رہے۔ انہوں نے کہا کہ پی ٹی آئی آئین و قانون کی بالادستی پر یقین رکھتی ہے۔
ان کا کہنا تھا کہ الیکشن میں فارم 47 حکومت کی تائید نہیں کرتا، اور یہ عوامی رائے کی عکاسی نہیں کرتا۔ انہوں نے تجویز دی کہ پارلیمنٹ کا مشترکہ اجلاس بلانے کے بجائے آل پارٹیز کانفرنس (اے پی سی) منعقد کی جائے تاکہ قومی اتفاق رائے پیدا کیا جا سکے۔
سلمان اکرم راجا نے عدلیہ پر تنقید کرتے ہوئے کہا کہ 26ویں آئینی ترمیم کی صورت میں عدالتوں پر حملہ کیا گیا ہے، اور موجودہ حالات میں عدالتی نظام اپنی اصل روح کے مطابق کام نہیں کر رہا۔
یہ بھی پڑھیں : عمران خان کی قیادت ہی قوم کو متحد کر سکتی ہے،پی ٹی آئی اعلامیہ جاری
انہوں نے واضح کیا کہ عمران خان کی صحت سے متعلق قیاس آرائیاں بے بنیاد ہیں، انہیں شوگر یا بلڈ پریشر کی کوئی شکایت نہیں۔قید تنہائی کا مطلب ہے کہ ان کی کسی سے ملاقات نہیں کرائی جا رہی، جو قابل تشویش ہے۔
