ایشیا کپ کے دوران بھارتی کپتان سوریا کمار یادیو کی ایک اور متنازعہ حرکت سامنے آئی ہے۔ بھارتی میڈیا کی رپورٹ کے مطابق سوریا کمار یادیو نے واضح کیا ہے کہ اگر بھارتی ٹیم ایشیا کپ جیتتی ہے تو وہ ٹرافی پاکستان کرکٹ بورڈ کے چیئرمین اور ایشین کرکٹ کونسل کے موجودہ چیئرمین محسن نقوی کے ہاتھ سے وصول نہیں کریں گے۔ بھارتی ٹیم کی جانب سے یہ پیغام ایشین کرکٹ کونسل کو بھیج دیا گیا ہے۔
دوسری جانب، پاکستان کرکٹ بورڈ نے بین الاقوامی کرکٹ کونسل (آئی سی سی) کو ایک اور خط لکھ کر میچ ریفری اینڈی پائیکرافٹ کو ہٹانے کا اپنا مطالبہ دہرایا ہے۔ اینڈی پائیکرافٹ کی موجودگی پر پی سی بی کی طرف سے سخت اعتراضات کے باعث پاکستان اور متحدہ عرب امارات کے درمیان آج ہونے والے میچ کے انعقاد پر بھی سوالات اٹھ رہے ہیں۔
ذرائع کے مطابق، اگر اینڈی پائیکرافٹ کو ہٹایا نہیں گیا تو پاکستان کرکٹ بورڈ ایشیا کپ کے باقی میچز کا بائیکاٹ کرنے کے موقف پر قائم ہے۔ پی سی بی کا کہنا ہے کہ آئی سی سی کی انکوائری صرف ظاہری تھی اور اس میں تمام پہلوؤں کا جائزہ نہیں لیا گیا، نہ ہی متعلقہ افراد سے رابطہ کیا گیا۔
یہ صورتحال ایشیا کپ کے دوران کھیل کے معیار اور کھیل کے جذبے کو شدید متاثر کر سکتی ہے، جبکہ کرکٹ شائقین کے درمیان بھی کشیدگی بڑھنے کا خدشہ ہے۔
