ایشین کرکٹ کونسل (اے سی سی) نے بھارتی کرکٹ ٹیم کے غیر مناسب رویے کے باعث انہیں چیمپئن شپ کی ٹرافی نہ دینے کا فیصلہ کیا ہے۔ معتبر ذرائع کے مطابق، اے سی سی کے صدر محسن نقوی بھارتی ٹیم کے رویے پر ڈٹ گئے اور انکار کے بعد واضح طور پر ہدایت دی کہ بھارتی ٹیم کو ٹرافی نہیں دی جائے گی۔
ذرائع کا کہنا ہے کہ بھارتی ٹیم کے رویے نے نہ صرف کرکٹ کے کھیل کی روح کو متاثر کیا بلکہ اس سے کھیل کے عالمی امیج پر بھی منفی اثر پڑا۔ اسی بنیاد پر فیصلہ کیا گیا کہ بھارتی ٹیم کو نہ اسٹیڈیم میں اور نہ ہی ہوٹل پہنچنے کے بعد ٹرافی دی جائے گی۔
مزید اطلاعات کے مطابق، صدر اے سی سی محسن نقوی بھارتی ٹیم کے ردعمل کے بعد دبئی اسٹیڈیم سے واپس روانہ ہو گئے۔ معاملے کی سنگینی کے پیش نظر آئندہ دنوں میں اس پر باقاعدہ اعلامیہ بھی جاری کیے جانے کا امکان ہے۔
واضح رہے کہ کھیل کے میدان میں صرف کارکردگی ہی نہیں، بلکہ کھلاڑیوں کا رویہ اور اسپورٹس مین اسپرٹ بھی اہم کردار ادا کرتے ہیں، اور اے سی سی کا یہ فیصلہ اسی اصول کی ترجمانی کرتا ہے۔
