محکمۂ موسمیات نے پیشگوئی کی ہے کہ ملک کے مختلف علاقوں میں بارش اور پہاڑوں پر برفباری کا امکان ہے۔ بیشتر میدانی علاقے خشک اور سرد موسم کی لپیٹ میں رہیں گے، جبکہ پہاڑی علاقوں میں رات اور صبح کے اوقات میں سردی کی شدت میں اضافہ متوقع ہے۔
محکمۂ موسمیات کے مطابق بالائی خیبرپختونخوا، گلگت بلتستان اور قریبی پہاڑی علاقوں میں مطلع جزوی طور پر ابر آلود رہنے کے ساتھ چند مقامات پر ہلکی بارش یا برفباری ہو سکتی ہے۔
دوسری جانب، مسلسل خشک موسم اور فضائی آلودگی کے باعث مشرقی پنجاب کے کئی اضلاع اسموگ کی لپیٹ میں رہیں گے۔ محکمہ نے شہریوں کو احتیاطی تدابیر اختیار کرنے کی ہدایت کی ہے۔
اسلام آباد، مری، گلیات اور گردونواح میں موسم خشک اور سرد رہنے کا امکان ہے، جبکہ لاہور، گوجرانوالہ، قصور، شیخوپورہ، اوکاڑہ، فیصل آباد، سیالکوٹ، خانیوال، رحیم یار خان، بہاولپور اور ملتان میں اسموگ برقرار رہنے کی توقع ہے۔
سندھ اور بلوچستان کے بیشتر اضلاع میں موسم خشک اور ٹھنڈا رہے گا، تاہم ساحلی علاقوں میں مطلع جزوی ابرآلود رہنے کی پیشگوئی کی گئی ہے۔
محکمۂ موسمیات کے مطابق چترال، دیر، سوات، کوہستان، کرم اور مانسہرہ میں بارش کا امکان ہے، جبکہ گلگت بلتستان کے چند علاقوں میں پہاڑوں پر برفباری متوقع ہے۔ آزاد کشمیر میں بھی مطلع جزوی ابرآلود اور موسم سرد رہے گا۔
گزشتہ 24 گھنٹوں کے دوران ملک کے بیشتر حصوں میں موسم خشک رہا، جبکہ پہاڑی علاقوں میں سردی اور پنجاب کے مشرقی اضلاع میں اسموگ کا راج برقرار رہا۔
