صدرمملکت آصف علی زرداری تین روزہ سرکاری دورے پر قطر پہنچ گئے، جہاں ان کا حماد انٹرنیشنل ایئرپورٹ پر سینئر قطری حکام اور پاکستان کے سفیر نے پرتپاک استقبال کیا اور انہیں گلدستہ پیش کیا گیا۔
صدر زرداری اپنے دورۂ قطر کے دوران عالمی سماجی ترقیاتی کانفرنس میں شرکت کریں گے، جہاں وہ سماجی ترقی، جامع معاشی نمو اور غربت میں کمی کے لیے پاکستان کے اقدامات پر روشنی ڈالیں گے۔ اس دوران صدر مملکت بینظیر انکم سپورٹ پروگرام (BISP) کے کردار اور پاکستان میں سماجی تحفظ کے نظام کو مستحکم بنانے کے اقدامات سے شرکاء کو آگاہ کریں گے۔
مزید برآں، صدر زرداری دوحہ الائنس برائے سوشل پروٹیکشن اینڈ جابز کمپیکٹ کے آغاز سے متعلق اقدامات پر بھی گفتگو کریں گے، جبکہ عالمی ترقیاتی وعدوں سے ہم آہنگ منصوبوں، مالی وسائل کے حصول اور ایس ڈی جی اسٹیمولیس سمیت دیگر عالمی اقدامات کی اہمیت پر زور دیں گے۔
صدر مملکت اپنے قیام کے دوران مختلف عالمی و علاقائی رہنماؤں اور بین الاقوامی تنظیموں کے نمائندوں سے ملاقاتیں بھی کریں گے تاکہ سماجی اور معاشی ترقی کے میدان میں باہمی تعاون کو مزید فروغ دیا جا سکے۔
