اسلام آباد: اسٹیٹ بینک آف پاکستان نے اوورسیز پاکستانیوں کی جانب سے بھیجی جانے والی ترسیلات زر سے متعلق تازہ اعداد و شمار جاری کر دیے ہیں۔
مرکزی بینک کے مطابق جنوری کے مہینے میں بیرونِ ملک مقیم پاکستانیوں نے 3 ارب 47 کروڑ ڈالر وطن منتقل کیے۔
اعداد و شمار کے مطابق ترسیلات زر میں دسمبر کے مقابلے میں جنوری کے دوران تقریباً 4 فیصد کمی ریکارڈ کی گئی، تاہم گزشتہ سال کے اسی مہینے کے مقابلے میں ترسیلات زر میں 15 فیصد اضافہ دیکھا گیا ہے، جو ایک مثبت رجحان کی عکاسی کرتا ہے۔
اسٹیٹ بینک کا کہنا ہے کہ رواں مالی سال کے پہلے سات ماہ، یعنی جولائی سے جنوری کے دوران اوورسیز پاکستانی مجموعی طور پر 23 ارب 20 کروڑ ڈالر وطن بھیج چکے ہیں۔ یہ حجم گزشتہ مالی سال کے اسی عرصے کے مقابلے میں نمایاں بہتری ظاہر کرتا ہے۔
اعداد و شمار کے مطابق ترسیلات زر بھیجنے والے ممالک میں سعودی عرب سرفہرست رہا، جہاں سے پاکستانیوں نے 74 کروڑ ڈالر وطن منتقل کیے۔
متحدہ عرب امارات دوسرے نمبر پر رہا، جہاں سے 70 کروڑ ڈالر کی ترسیلات پاکستان بھیجی گئیں۔
یہ بھی پڑھیں : پشاور اور مردان میں ٹیکس نادہندگان کے خلاف کریک ڈاؤن، متعدد یونٹس سیل
برطانیہ سے مقیم پاکستانیوں نے جنوری میں 57 کروڑ ڈالر جبکہ امریکا سے 30 کروڑ ڈالر وطن بھیجے۔ دیگر ممالک سے آنے والی ترسیلات زر نے بھی مجموعی حجم میں اہم کردار ادا کیا۔
اسٹیٹ بینک کے مطابق اگر موجودہ رجحان برقرار رہا تو رواں مالی سال کے اختتام تک ترسیلات زر کا مجموعی حجم 42 ارب ڈالر تک پہنچنے کا امکان ہے، جو ملکی معیشت کے لیے ایک اہم سہارا ثابت ہو سکتا ہے۔
