شہزاد نوید
سوات کے علاقے سیدو شریف میں بچوں کی معمولی لڑائی نے خونی تصادم کی شکل اختیار کر لی جس کے نتیجے میں ایک وکیل جاں بحق اور دونوں فریقین کے سات افراد زخمی ہو گئے۔
پولیس ذرائع کے مطابق تھانہ سیدو شریف کی حدود میں دو فریقین کے درمیان تکرار کے بعد اسلحہ آتشیں کا آزادانہ استعمال کیا گیا، جس کی زد میں آکر عطاء اللہ جان ایڈوکیٹ جاں بحق ہو گئے۔
فائرنگ کےتبادلے میں ایک فریق کے فضل اللہ، محمد سرتاج اور منصور زخمی ہوئے جبکہ دوسرے فریق کے فضل خالق، فضل رحیم، حبیب اللہ اور اشفاق کو گولیاں لگیں۔
واقعے کے فوری بعد پولیس اور امدادی ٹیموں نے موقع پر پہنچ کر زخمیوں کو کیجولٹی ہسپتال منتقل کیا جہاں انہیں طبی امداد دی جا رہی ہے۔
پولیس نے واقعے کی تفتیش شروع کر دی ہے تاکہ ملوث افراد کے خلاف قانونی کارروائی عمل میں لائی جا سکے۔
