وزیراعظم محمد شہباز شریف نے غزہ امن بورڈ کے پہلے افتتاحی اجلاس سے خطاب کرتے ہوئے اسے ایک تاریخی موقع اور اپنے لیے باعثِ افتخار قرار دیا ہے۔
وزیراعظم نے اپنے خطاب میں اس عزم کا اعادہ کیا کہ غزہ میں پائیدار امن کا قیام ہمارا اولین مشن ہے اور انہوں نے دعا کی کہ عالمی برادری اس مقصد کے حصول میں کامیاب ہو۔
وزیراعظم نے واضح کیا کہ مشرقِ وسطیٰ میں مستقل امن کے لیے ایک آزاد اور خودمختار فلسطینی ریاست کا قیام ناگزیر ہے، جس کے بغیر خطے میں استحکام ممکن نہیں۔
انہوں نے غزہ امن بورڈ کے قیام کو مشرقِ وسطیٰ کی تاریخ کا ایک سنہری باب قرار دیا۔
وزیراعظم نے عالمی تنازعات کے حل میں امریکی صدر ڈونلڈ ٹرمپ کے کردار کو بھی بھرپور طریقے سے سراہا۔
انہوں نے کہا کہ صدر ٹرمپ کی بروقت مداخلت کی بدولت پاک بھارت جنگ کا خطرہ ٹلا، جس سے نہ صرف ہزاروں قیمتی جانیں بچیں بلکہ جنوبی ایشیا ایک بڑی تباہی سے بھی محفوظ رہا۔
وزیراعظم کا کہنا تھا کہ صدر ٹرمپ کی امن پسندی اور تنازعات کو حل کرنے کی کوششیں عالمی سطح پر قابلِ تحسین ہیں۔
