وزیرِ اعلیٰ خیبر پختونخوا 19 اپریل کو تیسری بار مردان کا دورہ کریں گے، تاہم گزشتہ دو دوروں کے دوران کسی بڑے ترقیاتی منصوبے کے اعلان نہ ہونے پر شہریوں میں مایوسی پائی جا رہی ہے۔
مقامی ذرائع کے مطابق مردان کے عوام صحت، تعلیم اور مواصلات جیسے بنیادی شعبوں میں درپیش مسائل کے حل کے لیے عرصہ دراز سے اقدامات کے منتظر ہیں۔ شہریوں کا کہنا ہے کہ بار بار کے دوروں کے باوجود زمینی سطح پر خاطر خواہ بہتری نظر نہیں آئی۔
اب تیسری بار مجوزہ دورے کے موقع پر شہریوں کی نظریں ایک بار پھر حکومتی اعلان اور عملی اقدامات پر مرکوز ہیں۔ عوام امید کر رہے ہیں کہ اس بار ترقیاتی منصوبوں کا اعلان کیا جائے گا اور دیرینہ مسائل کے حل کے لیے ٹھوس اقدامات سامنے آئیں گے۔
شہریوں نے توقع ظاہر کی ہے کہ وزیرِ اعلیٰ اپنے دورے کے دوران نہ صرف علاقے کے مسائل کا نوٹس لیں گے بلکہ ان کے حل کے لیے فوری اور عملی حکمت عملی بھی پیش کریں گے، تاکہ علاقے میں ترقی کا نیا دور شروع ہو سکے۔
