وزیراعظم محمد شہباز شریف اپنے سرکاری دورے پر ترکیہ کے شہر انطالیہ پہنچ گئے ہیں جہاں ہوائی اڈے پر انطالیہ کے گورنر ہلوسی شاہین نے پاکستانی وفد کا پرتپاک استقبال کیا۔
اس موقع پر ترکیہ میں پاکستان کے سفیر یوسف جنید اور دیگر اعلیٰ سفارتی حکام بھی موجود تھے۔
وزیرِ اعظم کل پانچویںانطالیہ ڈپلومیسی فورم میں شرکت کریں گے جہاں وہ خصوصی طور پر “لیڈرز پینل” کا حصہ بنیں گے اور عالمی فورم کے سامنے پاکستان کا موقف اور نقطہ نظر پیش کریں گے۔
اس اہم بین الاقوامی فورم کے دوران وزیر اعظم شہباز شریف کی ترکیہ کے صدر رجب طیب ایردوان اور دیگر عالمی رہنماؤں سے دوطرفہ ملاقاتیں بھی متوقع ہیں جن میں باہمی دلچسپی کے امور اور علاقائی صورتحال پر تبادلہ خیال کیا جائے گا۔
وزیرِ اعظم کے ہمراہ اعلیٰ سطح کا وفد بھی ترکیہ پہنچا ہے جس میں نائب وزیر اعظم و وزیر خارجہ سینیٹر اسحاق ڈار، وزیر اطلاعات و نشریات عطاء اللہ تارڑ، معاون خصوصی طارق فاطمی اور وزیرِ اعظم کے ترجمان برائے بین الاقوامی میڈیا مشرف زیدی شامل ہیں۔
