حکومت پنجاب نے مہنگائی کے بوجھ میں کمی اور عوام کو ریلیف فراہم کرنے کے لیے شروع کیے گئے فیول ریلیف پروگرام کے تحت مستحق شہریوں کو مالی امداد کی فراہمی کا آغاز کر دیا ہے۔
حکومتی ذرائع کے مطابق اس پروگرام کے تحت اہل افراد کے بینک اکاؤنٹس میں 2 ہزار روپے کی سبسڈی منتقل کی جا رہی ہے۔
یہ رقوم بینک آف پنجاب کے ذریعے ان شہریوں کو فراہم کی جا رہی ہیں جنہوں نے مقررہ طریقہ کار کے مطابق درخواستیں جمع کرائیں اور جن کی درخواستوں کی مکمل جانچ پڑتال کے بعد منظوری دی گئی۔
حکام کا کہنا ہے کہ اس اسکیم کا بنیادی مقصد ان شہریوں کو سہولت فراہم کرنا ہے جو روزمرہ آمدورفت کے لیے موٹر سائیکل استعمال کرتے ہیں اور بڑھتی ہوئی ایندھن کی قیمتوں کے باعث مالی دباؤ کا شکار ہیں۔
تفصیلات کے مطابق صرف وہی افراد اس پروگرام کے اہل قرار پائے ہیں جن کے نام پر ذاتی موٹر سائیکل رجسٹرڈ ہے۔ درخواست دہندگان کی معلومات کی نادرا اور دیگر متعلقہ اداروں کے ڈیٹا سے تصدیق کی گئی ہے تاکہ شفافیت اور میرٹ کو یقینی بنایا جا سکے۔
یہ بھی پڑھیں : ایچ ای سی: طلبہ کے لیے ملک گیر ٹیلنٹ ہنٹ پروگرام شروع کرنے کا اعلان
حکومت نے واضح کیا ہے کہ امداد کی تقسیم کے عمل میں مکمل شفافیت برقرار رکھی جا رہی ہے اور صرف حقیقی مستحق افراد تک ہی یہ سہولت پہنچائی جا رہی ہے۔
مزید بتایا گیا ہے کہ شہریوں کو رقم حاصل کرنے کے لیے کسی دفتر جانے کی ضرورت نہیں، بلکہ وہ اپنے بینک اکاؤنٹس کے ذریعے آسانی سے رقم وصول کر سکتے ہیں۔ اہل افراد کو ایس ایم ایس کے ذریعے بھی اطلاع دی جا رہی ہے تاکہ وہ بروقت اس سہولت سے فائدہ اٹھا سکیں۔
حکومت پنجاب نے عندیہ دیا ہے کہ ضرورت پڑنے پر اس پروگرام کو مزید وسعت دی جا سکتی ہے۔
