ملک بھر میں بجلی کی بڑھتی ہوئی قیمتوں اور لوڈشیڈنگ کے مسائل کے باعث شہریوں کا رجحان تیزی سے متبادل توانائی کی طرف بڑھ رہا ہے، اور اسی دوران عوام کیلئے ایک اہم اور خوش آئند پیش رفت سامنے آئی ہے۔
عالمی مارکیٹ میں سولر پینلز اور سولر سیلز کی قیمتوں میں نمایاں کمی کے بعد پاکستان میں بھی سولر سسٹمز کی قیمتوں میں واضح کمی ریکارڈ کی جا رہی ہے۔
مارکیٹ ذرائع کے مطابق عالمی سطح پر قیمتیں تاریخی کم ترین سطح کے قریب پہنچنے کے بعد اب استحکام کی طرف جا رہی ہیں، جس کا براہِ راست فائدہ مقامی صارفین کو پہنچ رہا ہے۔
رپورٹس کے مطابق پاکستانی کرنسی میں سولر سیلز کی قیمت تقریباً 13 روپے 50 پیسے فی واٹ تک آ گئی ہے، جسے توانائی کے شعبے میں ایک اہم پیش رفت قرار دیا جا رہا ہے۔
ماہرین کا کہنا ہے کہ عالمی پیداوار میں اضافے کے باعث گزشتہ چند برسوں میں سولر ٹیکنالوجی کی قیمتوں میں مسلسل کمی دیکھی گئی ہے۔
توانائی کے شعبے سے وابستہ ماہرین کے مطابق اس کمی کے نتیجے میں نہ صرف گھریلو صارفین بلکہ تجارتی اور صنعتی طبقہ بھی بھرپور فائدہ اٹھا سکے گا۔
یہ بھی پڑھیں : ایک اور امتحان، ایک اور ناکامی: ٹیسٹ کرکٹ میں پاکستان کی مشکلات برقرار
ان کا کہنا ہے کہ موجودہ حالات میں سولر سسٹم لگوانا ایک معاشی طور پر دانشمندانہ فیصلہ ثابت ہو سکتا ہے کیونکہ یہ طویل المدتی بچت کا مؤثر ذریعہ ہے۔
مارکیٹ میں 5 کلو واٹ اور 10 کلو واٹ کے گھریلو سولر سسٹمز کی قیمتوں میں بھی نمایاں کمی دیکھنے میں آ رہی ہے، جبکہ مختلف کمپنیوں کی جانب سے آسان اقساط اور خصوصی پیکجز بھی متعارف کرائے جا رہے ہیں تاکہ زیادہ سے زیادہ صارفین اس سہولت سے فائدہ اٹھا سکیں۔
ماہرین نے توقع ظاہر کی ہے کہ اگر عالمی مارکیٹ میں یہی رجحان برقرار رہا تو آئندہ چند ماہ میں پاکستان میں سولر سسٹمز مزید سستے ہو سکتے ہیں، جس سے نہ صرف عوام کو ریلیف ملے گا بلکہ قابلِ تجدید توانائی کے فروغ میں بھی مدد ملے گی۔
