چمن پھاٹک کے قریب عید کی خوشیوں کے موقع پر ایک انتہائی افسوسناک اور دل دہلا دینے والا واقعہ پیش آیا، مسافروں سے بھری ٹرین کو نشانہ بنایا گیا۔ حملے کے وقت بڑی تعداد میں شہری، جن میں خواتین اور بچے بھی شامل تھے، اپنے گھروں کو عید منانے کے لیے سفر کر رہے تھے۔
دھماکے اور فائرنگ کے اس دلخراش واقعے میں متعدد بے گناہ شہری شہید اور زخمی ہوگئے جبکہ جائے وقوعہ پر قیامت صغریٰ کا منظر دیکھنے میں آیا، ریسکیو ٹیموں نے فوری طور پر امدادی کارروائیاں شروع کرتے ہوئے زخمیوں کو قریبی ہسپتال منتقل کیا۔
صوبائی مشیر برائے کھیل و امورِ نوجوانان مینا مجید بلوچ نے واقعے کی شدید الفاظ میں مذمت کرتے ہوئے کہا کہ معصوم اور نہتے شہریوں کو نشانہ بنانا ایک بزدلانہ اور انسانیت سوز عمل ہے۔ انہوں نے کہا کہ عید جیسے خوشی کے موقع پر اس طرح کی خونریزی نے پورے علاقے کو سوگوار کر دیا ہے۔
آج ایک بار پھر ناپاک اور فتنہ الہندوستان کے دہشتگردوں نے کوئٹہ میں معصوم شہریوں کو اپنی بزدلانہ دہشتگردی کا نشانہ بنایا۔ چمن پھاٹک کے قریب عید کی چھٹیوں پر اپنے گھروں کو جانے والے نہتے مسافروں، خواتین اور بچوں سے بھری ٹرین پر حملہ انسانیت پر حملہ ہے۔
اس خونریزی میں بلوچستان کے…— Meena Majeed Baloch, MPA (@Meena_Majeed) May 24, 2026
انہوں نے شہداء کے درجات کی بلندی اور لواحقین کے لیے صبر جمیل کی دعا کرتے ہوئے کہا کہ پوری قوم اس دکھ کی گھڑی میں متاثرہ خاندانوں کے ساتھ کھڑی ہے۔
سیکیورٹی فورسز نے علاقے کو گھیرے میں لے کر شواہد اکٹھے کرنا شروع کر دیے ہیں جبکہ واقعے کی تحقیقات جاری ہیں۔
