تلہ گنگ: پنجاب کے علاقے تلہ گنگ میں ایک افسوسناک ٹریفک حادثے کے نتیجے میں موٹرسائیکل سوار تین افراد جاں بحق ہوگئے۔ حادثہ چکوال روڈ پر نکہ کہوٹ کے قریب پیش آیا، جہاں مخالف سمت سے آنے والی ایک مسافر بس موٹرسائیکل سے ٹکرا گئی۔
ریسکیو ذرائع کے مطابق حادثہ اس قدر شدید تھا کہ موٹرسائیکل پر سوار تینوں افراد موقع پر ہی دم توڑ گئے۔ جاں بحق ہونے والوں کی شناخت فخر عباس، عبدالاحد اور واجد حسین کے ناموں سے ہوئی ہے۔
ذرائع کا کہنا ہے کہ تینوں نوجوان موٹرسائیکل پر سوار ہو کر اپنے آبائی گاؤں لکھوال واپس جا رہے تھے کہ راستے میں یہ المناک حادثہ پیش آ گیا، جس سے علاقے میں سوگ کی فضا چھا گئی۔
حادثے کی اطلاع ملتے ہی ریسکیو ٹیموں اور پولیس اہلکاروں نے موقع پر پہنچ کر امدادی کارروائیاں شروع کیں۔ پولیس نے ضروری قانونی کارروائی کے بعد جاں بحق افراد کی لاشیں مقامی ہسپتال منتقل کر دیں۔
یہ بھی پڑھیں : تیز ہواؤں اور گرج چمک کے ساتھ بارشیں، خیبر پختونخوا کے لیے الرٹ جاری
پولیس حکام کے مطابق جائے وقوعہ سے شواہد اکٹھے کر لیے گئے ہیں جبکہ حادثے کی وجوہات جاننے کے لیے تحقیقات کا آغاز کر دیا گیا ہے۔ حکام کا کہنا ہے کہ تحقیقات مکمل ہونے کے بعد واقعے کے ذمہ داروں کے خلاف قانون کے مطابق کارروائی عمل میں لائی جائے گی۔
مقامی افراد نے حادثے پر گہرے دکھ اور افسوس کا اظہار کرتے ہوئے سڑکوں پر ٹریفک قوانین پر سختی سے عمل درآمد اور حادثات کی روک تھام کے لیے مؤثر اقدامات کا مطالبہ کیا ہے۔
