2026 میں دنیا کے طاقتور ترین پاسپورٹس کی نئی درجہ بندی جاری کردی گئی ہے جس میں کچھ ممالک نے اپنی برتری برقرار رکھی ہے جبکہ کچھ نے گزشتہ برسوں کے مقابلے میں نمایاں ترقی کی ہے۔
دنیا بھر میں پاسپورٹس کی معتبر ترین درجہ بندی سمجھے جانے والے ہینلے پاسپورٹ انڈیکس کے مطابق 199 پاسپورٹس کو دنیا کے 227 سفری مقامات تک رسائی کے حوالے سے جانچا جاتا ہے، یہ ڈیٹا انٹرنیشنل ایئر ٹرانسپورٹ ایسوسی ایشن فراہم کرتی ہے، 2026 میں چار ممالک کے پاسپورٹس دنیا کے سب سے زیادہ طاقتور قرار پائے ہیں۔
سنگاپور: دنیا کا سب سے طاقتور پاسپورٹ
سنگاپور مسلسل تیسرے سال ہینلے پاسپورٹ انڈیکس میں پہلے نمبر پر موجود ہے، 2026 میں سنگاپور کا پاسپورٹ رکھنے والے شہریوں کو دنیا کے 192 مقامات پر بغیر ویزا سفر کی سہولت حاصل ہے جس کے باعث یہ دنیا کا سب سے طاقتور پاسپورٹ قرار پایا۔
سنگاپور نے پہلی بار 2019 میں پہلی پوزیشن حاصل کی تھی، 2006 میں یہ آٹھویں نمبر پر تھا تاہم وقت کے ساتھ مضبوط عالمی شراکت داری، مستحکم معیشت، بہتر حکمرانی، اعلیٰ سکیورٹی معیار اور عالمی سطح پر قابلِ اعتماد ساکھ نے اس کے پاسپورٹ کو مزید مضبوط بنایا۔
جاپان: سفارتی استحکام کے باعث مضبوط مقام
جاپان کئی برسوں تک دنیا کے نمبر ون پاسپورٹ کا حامل رہا تاہم اب یہ دوسرے نمبر پر آ گیا ہے، جاپانی پاسپورٹ کے ذریعے 188 ممالک میں بغیر ویزا یا ویزا آن ارائیول کی سہولت دستیاب ہے۔
رپورٹ کے مطابق جاپان کی مضبوط پوزیشن کسی ایک سفارتی کامیابی کے بجائے کئی دہائیوں پر محیط عالمی تعلقات، معاشی استحکام اور مسلسل سفارتی تعاون کا نتیجہ ہے۔
جاپانی شہریوں کو یورپ کے شینگن ممالک، لاطینی امریکا اور جنوب مشرقی ایشیا سمیت دنیا کے بیشتر اہم مقامات تک آسان رسائی حاصل ہے۔
جنوبی کوریا: جاپان کے برابر مقام
جنوبی کوریا بھی جاپان کے ساتھ دوسرے نمبر پر موجود ہے، دونوں ممالک کے پاسپورٹس 188 مقامات تک رسائی فراہم کرتے ہیں، اسی لیے ہینلے انڈیکس نے انہیں مشترکہ درجہ دیا ہے۔
جنوبی کوریا کی ترقی بھی جاپان کی طرح تجارت کے فروغ اور سفارتی تعلقات میں وسعت سے جڑی ہوئی ہے، گزشتہ دو دہائیوں میں ویزا سہولتوں کے معاہدوں میں اضافے نے جنوبی کوریا کے پاسپورٹ کو دنیا کے مضبوط ترین پاسپورٹس میں شامل کر دیا ہے۔
سنگاپور، جاپان اور جنوبی کوریا سمیت ایشیائی ممالک مسلسل عالمی درجہ بندی میں سرفہرست رہتے ہیں کیونکہ ان کے شہریوں کو غیر معمولی سفری آزادی حاصل ہے۔
متحدہ عرب امارات: سب سے تیزی سے ترقی کرنے والا پاسپورٹ
اگر سنگاپور، جاپان اور جنوبی کوریا استحکام کی علامت ہیں تو متحدہ عرب امارات تیز رفتار ترقی کی مثال ہے، ہینلے پاسپورٹ انڈیکس کی 20 سالہ تاریخ میں کسی بھی ملک کے پاسپورٹ نے اتنی تیزی سے ترقی نہیں کی جتنی متحدہ عرب امارات کے پاسپورٹ نے کی ہے۔
2006 سے اب تک متحدہ عرب امارات نے 149 اضافی ویزا فری مقامات حاصل کیے اور درجہ بندی میں 57 درجے بہتری کی، 2026 میں اماراتی پاسپورٹ جاپان اور جنوبی کوریا کے ساتھ دنیا کے مضبوط ترین پاسپورٹس میں شامل ہوگیا جو 187 مقامات تک بغیر ویزا رسائی فراہم کرتا ہے۔
ہینلے انڈیکس کے مطابق متحدہ عرب امارات کی ترقی کی بڑی وجوہات مسلسل سفارتی کوششیں اور ویزا سہولتوں میں اضافہ ہیں، تاہم اماراتی شہریوں کو امریکا کے لیے ابھی ویزا فری رسائی حاصل نہیں جبکہ سنگاپور، جاپان اور جنوبی کوریا کے شہریوں کو یہ سہولت حاصل ہے۔
پاسپورٹ رینکنگ اصل میں کیا ظاہر کرتی ہے؟
پاسپورٹ رینکنگ کا مطلب یہ نہیں کہ ہر ملک میں بغیر کسی کارروائی کے داخلہ ممکن ہوگا، ہینلے انڈیکس ان ممالک کو شمار کرتا ہے جہاں سفر سے پہلے ویزا درکار نہیں ہوتا جبکہ بعض صورتوں میں ویزا آن ارائیول، وزیٹر پرمٹ یا الیکٹرانک ٹریول اجازت نامے بھی شامل کیے جاتے ہیں بشرطیکہ ان کے لیے پہلے سے حکومتی منظوری درکار نہ ہو۔
یہ بھی پڑھیں: امریکی امیگریشن میں بڑا بدلاؤ، ویزہ کے لیے صحت کے معیار سخت کر دیے گئے
