ویمنز ایشیا کپ میں سنسنی خیز مقابلے کے بعد سری لنکا نے پاکستان کو شکست دے کر فائنل کے لیے کوالیفائی کر لیا۔
دبئی میں کھیلے گئے ویمنز ایشیا کپ کے دوسرے سیمی فائنل میں سری لنکا کی خواتین ٹیم نے شاندار کارکردگی کا مظاہرہ کرتے ہوئے پاکستان کو 4 وکٹوں سے ہرا دیا اور فائنل میں جگہ بنالی، جہاں اب اس کا مقابلہ بھارت سے ہوگا۔
میچ میں پاکستان نے پہلے بلے بازی کرتے ہوئے مقررہ 20 اوورز میں 5 وکٹوں کے نقصان پر 130 رنز بنائے۔
کپتان فاطمہ ثنا نے ذمے دارانہ کھیل پیش کرتے ہوئے 36 گیندوں پر 4 چوکے اور 2 چھکوں کی مدد سے 47 رنز کی بہترین اننگز کھیلی۔
اس کے علاوہ شوال ذوالفقار نے 24، گل فیروزہ نے 21 اور طوبہ حسن نے ناٹ آؤٹ 12 رنز بنائے۔
مقررہ 131 ہدف کے تعاقب میں سری لنکن ٹیم نے مطلوبہ ہدف 18.4 اوورز میں 6 وکٹوں کے نقصان پر پورا کر لیا۔
پاکستان کی طرف سے کپتان فاطمہ ثنا نے گیند بازی میں بھی جوہر دکھاتے ہوئے 3.4 اوورز میں 38 رنز دے کر 4 کھلاڑیوں کو آؤٹ کیا، جبکہ سعدیہ اقبال اور امِ ہانی کے حصے میں ایک ایک وکٹ آئی۔
