طلبہ کے لیے بڑی خوشخبری: ایچ ای سی کی جانب سے فل فنڈڈ سکالرشپس کا اعلان

ہائیر ایجوکیشن کمیشن (ایچ ای سی) نے کامن ویلتھ اسکالرشپ 2027 کے لیے درخواستوں کی وصولی کا آغاز کر دیا ہے۔

اس اسکالرشپ کے تحت پاکستان اور آزاد جموں و کشمیر سے تعلق رکھنے والے طلبہ برطانیہ کی یونیورسٹیوں میں بغیر کسی ٹیوشن فیس کے ماسٹرز اور پی ایچ ڈی کی ڈگریاں حاصل کر سکیں گے۔

تعلیمی سال 2027-28 کے لیے یہ اسکالرشپس کامن ویلتھ اسکالرشپ کمیشن (سی ایس سی) کے تعاون سے فراہم کی جا رہی ہیں، جبکہ ایچ ای سی پاکستان کی نامزد کنندہ ایجنسی کے طور پر فرائض انجام دے رہی ہے۔

اسکالرشپ کے تحت طلبہ کی مکمل ٹیوشن فیس، ماہانہ الائونس، پاکستان اور برطانیہ کے درمیان واپسی کا ہوائی جہاز کا ٹکٹ اور دیگر ضروری اخراجات کور کیے جائیں گے۔ ان دیگر اخراجات میں گرم کپڑوں کا الاؤنس، اسٹڈی ٹریول گرانٹ اور پی ایچ ڈی اسکالرز کے لیے تھیسس گرانٹ شامل ہیں۔

لندن سے باہر تعلیم حاصل کرنے والے طلبہ کے لیے ماہانہ وظیفہ 1,347 پاؤنڈز جبکہ لندن میں مقیم طلبہ کے لیے 1,652 پاؤنڈز مقرر کیا گیا ہے۔ تاہم امیدواروں کو موجودہ نرخوں اور مراعات کی تصدیق کے لیے آفیشل رہنمائی دیکھنے کی ہدایت کی گئی ہے۔

اہلیت کے معیارات کے مطابق درخواست دہندگان کا پاکستانی یا آزاد کشمیر کا شہری ہونا ضروری ہے۔ ماسٹرز کے امیدواروں کے لیے 16 سالہ تعلیم کے ساتھ فرسٹ ڈویژن یا مساوی سی جی پی اے لازمی ہے جبکہ پی ایچ ڈی کے امیدواروں کے لیے مقررہ پوسٹ گریجویٹ اہلیت ہونا ضروری ہے۔

اس کے علاوہ، امیدواروں کا ہائیر ایجوکیشن ایپٹی ٹیوڈ ٹیسٹ (ہیٹ) میں کم از کم 60 نمبر حاصل کرنا لازمی ہے،اور ان کی مجوزہ تحقیق یا تعلیم کا کامن ویلتھ کی ترقیاتی ترجیحات سے ہم آہنگ ہونا ضروری ہے۔

خواہشمند امیدواروں کو ایچ ای سی کے پورٹل scholarship.hec.gov.pk اور کامن ویلتھ اسکالرشپ کمیشن کی آفیشل ویب سائٹ دونوں پر اپلائی کرنا ہو گا۔