واشنگٹن:امریکی ٹیکنالوجی اور الیکٹرک گاڑیاں بنانے والی معروف کمپنی ٹیسلا نے اپنی مکمل خودکار اور ڈرائیور لیس گاڑی “سائبرکیب” (Cybercab) کو نجی استعمال کے لیے منتخب صارفین کو فروخت کرنے کی باقاعدہ پیشکش کر دی ہے۔
ٹیکنالوجی ماہرین کی جانب سے اس اقدام کو خودکار ڈرائیونگ ٹیکنالوجی کو تجارتی دائرے سے نکال کر عام صارفین تک پہنچانے کی جانب ایک انتہائی اہم اور انقلابی پیش رفت قرار دیا جا رہا ہے۔
ٹیسلا نے سماجی رابطے کی ویب سائٹ “ایکس” (X) پر سنہری رنگ کی دو نشستوں والی اس جدید سائبرکیب کی تصویر جاری کرتے ہوئے اس نئی پیشکش کا اعلان کیا۔
کمپنی کے مطابق اس گاڑی کی ابتدائی قیمت 29 ہزار 990 ڈالر مقرر کی گئی ہے، جبکہ گاڑی کی مکمل خودکار ڈرائیونگ کی سہولت سے فائدہ اٹھانے کے لیے صارفین کو ماہانہ 299 ڈالر کی رکنیت (سبسکرپشن) بھی حاصل کرنا ہوگی۔
دوسری جانب ٹیسلا کے سربراہ ایلون مسک نے اس حوالے سے اپنے بیان میں کہا ہے کہ متعلقہ حکام کی جانب سے ضابطہ جاتی منظوری حاصل ہوتے ہی یہ پیشکش ملک بھر کے صارفین کے لیے دستیاب ہوگی۔
ایلون مسک نے خودکار ڈرائیونگ کی ماہانہ رکنیت کی فیس کو قدرے زیادہ تسلیم کرتے ہوئے اسے کم کر کے تقریباً 115 ڈالر ماہانہ تک لانے کا عندیہ بھی دیا ہے، جو ٹیسلا کی دیگر گاڑیوں میں دستیاب مکمل خودکار ڈرائیونگ اور رابطے کی سہولیات کی موجودہ لاگت کے تقریباً برابر ہے۔
کمپنی کے اعلیٰ عہدیداران نے بھی اس منصوبے کے مستقبل کے لائحہ عمل سے پردہ اٹھایا ہے۔ ٹیسلا کے نائب صدر برائے گاڑیوں کی انجینئرنگ لارس موراوی نے گزشتہ ماہ واضح کیا تھا کہ کمپنی کا ہدف 2026 کے اختتام تک سائبرکیب روبوٹیکسی کی عام صارفین کو فروخت شروع کرنا ہے۔
یہ بھی پڑھیں : گریجویشن تقریب میں خوشیوں کی جگہ چیخ و پکار، 23 سالہ طالبہ دم توڑ گئیں
ادھر ٹیسلا کے مصنوعی ذہانت کے شعبے کے سربراہ اشوک ایلسوامی نے وضاحت کی ہے کہ سائبرکیب ابتدائی طور پر انہی مخصوص جغرافیائی علاقوں میں بغیر کسی انسانی نگرانی کے کام کرے گی جہاں کمپنی کی روبوٹیکسی سروس پہلے سے فعال ہے۔
واضح رہے کہ ٹیسلا نے بغیر انسانی نگرانی کے اپنی روبوٹیکسی سروس کا آغاز جون 2025 میں امریکی ریاست ٹیکساس کے شہر آسٹن سے کیا تھا، جس کے بعد رواں برس اپریل 2026 میں اس سروس کا دائرہ ڈیلاس اور ہیوسٹن تک بڑھایا گیا جبکہ جولائی میں میامی کے شہریوں کے لیے بھی یہ سہولت متعارف کرائی گئی۔
حالیہ پیشکش اس بات کا واضح ثبوت ہے کہ ٹیسلا اپنی جدید خودکار ٹیکنالوجی کو براہِ راست صارفین کی دہلیز تک پہنچانے کے لیے پرعزم ہے، تاہم اس گاڑی کی بڑے پیمانے پر فراہمی کا حتمی دارومدار سرکاری و ضابطہ جاتی منظوریوں سے مشروط ہوگا۔
