خیبرپختونخوا میں شدید گرمی کی لہر جاری ، جس کے باعث عوام شدید گرمی سے پریشان ہیں، بعض علاقوں میں بارش کی پیشگوئی کی ہے ۔
محکمہ موسمیات کے مطابق ملک کے جنوبی علاقے شدید گرمی کی لپیٹ میں رہیں گے اور مختلف علاقوں میں بارش اور ژالہ باری کی پیشگوئی بھی کی ہے ، ملک کے بیشتر علاقوں میں موسم گرم اور خشک جبکہ جنوبی علاقوں میں شدید گرم رہنے کا امکان ہے تاہم بالائی خیبر پختونخوا ،پنجاب ،گلگت بلتستان اور کشمیر میں مطلع جزوی ابر آلود رہنے کے علاوہ چند مقامات پر گرج چمک کیساتھ بارش اور ژالہ باری کی پیشگوئی ہے ۔
ذرائع کے مطابق خیبرپختونخوا کے بیشتر اضلاع میں موسم خشک ہے، لیکن جنوبی اضلاع جیسے ڈیرہ اسماعیل خان، بنوں اور تیمرگرہ میں شدید گرمی کی لہر برقرار ہے، جو اگلے چند روز تک جاری رہنے کی توقع ہے۔ دوسری طرف، چترال، دیر، سوات، شانگلہ، کوہستان اور مانسہرہ کے کچھ علاقوں میں آئندہ چوبیس گھنٹوں کے دوران بارش ہو سکتی ہے۔ ان علاقوں میں تیز ہواؤں اور گرج چمک کے ساتھ بارش کی پیشگوئی کی گئی ہے، جس سے گرمی میں عارضی کمی متوقع ہے۔
ماہرین موسمیات نے عوام کو مشورہ دیا ہے کہ وہ شدید گرمی سے بچاؤ کے لیے احتیاطی تدابیر اختیار کریں اور اگر ممکن ہو تو سورج کی تپش سے بچیں۔ ساتھ ہی، ممکنہ بارش کی پیشگوئی کے پیش نظر سفر کرنے والوں کو موسمی اپڈیٹس چیک کرنے کا بھی مشورہ دیا گیا ہے۔
