راولپنڈی: جنوبی وزیرستان کے ضلع سراروغہ میں بھارتی سرپرستی میں فتنہ الخوارج کے خلاف آپریشن کے دوران بہادری سے لڑتے ہوئے شہید ہونے والے میجر سید معیز عباس شاہ کی نماز جنازہ چکلالہ گیریژن راولپنڈی میں ادا کر دی گئی ہے۔
نماز جنازہ میں فیلڈ مارشل سید عاصم منیر، چیف آف آرمی سٹاف، وفاقی وزیر داخلہ، سینئر حاضر سروس فوجی اور سول افسران، افسران اور جوانوں نے شرکت کی۔
چیف آف آرمی سٹاف نے کہا کہ میجر سید معیز عباس نے مزاحمت کا بہادری سے مقابلہ کیا اور حب الوطنی کی اعلیٰ روایات کو برقرار رکھتے ہوئے اپنی جان کا نذرانہ پیش کیا۔
یہ بھی پڑھیں : میجر معیز اور فورسز کی قربانیاں رائیگاں نہیں جائیں گی، وزیر اعلیٰ خیبرپختونخوا
انہوں نے ملک کے دفاع کے لیے شہید کی لازوال قربانیوں کو سلام پیش کیا اور کہا کہ پوری قوم غم و غصے میں متحد ہے۔
شہید کا جسد خاکی ان کے آبائی شہر چکوال پہنچا دیا گیا ہے جہاں انہیں پورے فوجی اعزاز کے ساتھ سپرد خاک کیا جائے گا۔
