حالیہ مون سون بارشوں کے باعث تربیلا ڈیم میں پانی کی سطح میں مسلسل اضافہ ہو رہا ہے، جس سے نہ صرف آبی ذخائر بہتر ہوئے ہیں بلکہ بجلی کی پیداوار میں بھی نمایاں بہتری آئی ہے۔
ترجمان تربیلا ڈیم کے مطابق پانی کی سطح اس وقت ڈیڈ لیول سے 96 فٹ بلند ہو کر 1498.65 فٹ تک پہنچ چکی ہے، جبکہ پانی کی آمد 2 لاکھ 93 ہزار کیوسک ریکارڈ کی گئی ہے۔ پانی کی یہ آمد گزشتہ دنوں ہونے والی شدید بارشوں کا نتیجہ ہے، جو بالائی علاقوں میں جاری ہے۔
ترجمان کے مطابق ڈیم سے پانی کا اخراج 1 لاکھ 50 ہزار کیوسک کیا جا رہا ہے، جو زرعی آبپاشی اور توانائی کی ضروریات کے مطابق منظم طریقے سے جاری ہے۔
تربیلا ڈیم کے تمام 17 پیداواری یونٹس اس وقت مکمل طور پر فعال ہیں اور مجموعی طور پر 2613 میگاواٹ بجلی پیدا کر رہے ہیں، جو نیشنل گرڈ کو فراہم کی جا رہی ہے۔
ڈیم حکام نے بتایا ہے کہ موجودہ صورتحال نہایت اطمینان بخش ہے اور آئندہ دنوں میں پانی کی مزید آمد کی صورت میں بجلی کی پیداوار میں مزید اضافہ متوقع ہے۔
مون سون سیزن کے دوران پانی کی اس بہتری سے نہ صرف ملک کو توانائی بحران سے نمٹنے میں مدد ملے گی بلکہ زرعی شعبے کو بھی خاطر خواہ فائدہ پہنچے گا۔
