اسلام آباد: نئے سال 2026 کے آغاز پر پاک فوج کے جوانوں نے غیر متزلزل عزم اور قربانی کے جذبے کا اظہار کیا، ساتھ ہی وطن کے لیے بے لوث محبت کا پیغام بھی دیا۔
پاک فوج کے جاری کردہ پیغام میں کہا گیا کہ شدید سردی اور دشوار گزار جغرافیہ بھی ہمارے حوصلے پست نہیں کر سکتا۔
سرحدوں پر فوج کی موجودگی ہی قوم کے اطمینان اور سلامتی کی ضمانت ہے، اور کسی بھی دشمن کو سرحد پار سے میلی آنکھ سے دیکھنے کی اجازت نہیں دی جائے گی۔
پیغام میں مزید کہا گیا کہ گزشتہ برسوں میں کیے گئے کامیاب آپریشنز اور معرکہ حق کی کامیابی اس بات کا ثبوت ہیں کہ پاک فوج دشمن کے دانت کھٹے کرنے کی مکمل صلاحیت رکھتی ہے۔
فوجی جوان وطن کی حفاظت کے لیے ہر وقت چوکس رہیں گے اور امن و امان کو برقرار رکھنے کے لیے کسی بھی قربانی سے دریغ نہیں کریں گے۔
پاک فوج کے اس پیغام نے نئے سال کے آغاز پر ملک میں قوم کے دفاع کے جذبے کو مزید تقویت دی، اور عوام میں وطن پرستی اور قومی خدمت کے جذبے کو اجاگر کیا۔
یہ بھی پڑھیں : نئے خواب، نیا سال، نئی امیدیں: شاندار آتش بازی کے ساتھ 2026 کا پرجوش آغاز
پاکستان سمیت دنیا کے بیشتر ممالک میں نئے خوابوں، نئی امیدوں اور نئے عزم کے ساتھ سال 2026 کا آغاز ہو گیا ہے، جس کا ملک بھر میں بھرپور اور پرجوش انداز میں استقبال کیا گیا۔
مختلف شہروں میں شاندار آتش بازی کے مظاہرے کیے گئے اور آسمان رنگ برنگی روشنیوں سے جگمگا اٹھا، جبکہ شہریوں نے خوشی اور جوش و خروش کے ساتھ سالِ نو کو خوش آمدید کہا۔
وفاقی دارالحکومت اسلام آباد، لاہور، کراچی، پشاور، کوئٹہ اور دیگر شہروں میں نئے سال کی تقریبات منعقد ہوئیں۔ لاہور کے علاقے لبرٹی اور لبرٹی چوک میں پنجاب حکومت کی جانب سے شاندار آتش بازی کا اہتمام کیا گیا، جسے دیکھنے کے لیے شہریوں کی بڑی تعداد امڈ آئی۔ مختلف مقامات پر جشن کا سماں رہا، تاہم بعض علاقوں میں ٹریفک کے دباؤ کا سامنا بھی کرنا پڑا۔
شہر قائد کراچی میں بھی نئے سال کے موقع پر آتش بازی کے شاندار مناظر دیکھنے میں آئے، تاہم پابندی کے باوجود شہر کے بعض علاقوں میں ہوائی فائرنگ کے واقعات رپورٹ ہوئے۔
امن و امان کی صورتحال کو برقرار رکھنے کے لیے کراچی اور حیدرآباد میں دفعہ 144 نافذ کر دی گئی ہے۔ نوٹیفکیشن کے مطابق موٹرسائیکل کی ڈبل سواری، اسلحہ لے کر چلنے اور اس کی نمائش پر پابندی عائد ہے، جبکہ آتش بازی صرف مخصوص اجازت یافتہ مقامات تک محدود رہے گی۔
