وادی تیراہ میں مبینہ آپریشن اور سکیورٹی صورتحال پر سیاسی بیان بازی شدت اختیار کر گئی ہے۔ ایک نجی ٹی وی چینل کے پروگرام میں سیاسی رہنماؤں شفیع جان اور اختیار ولی خان کے درمیان تلخ جملوں کا تبادلہ ہوا، جس نے معاملے کو مزید سنگین بنا دیا۔ دونوں رہنماؤں نے نہ صرف ایک دوسرے پر سنگین الزامات عائد کیے بلکہ وفاقی اور صوبائی حکومتوں کے کردار پر بھی سخت سوالات اٹھائے۔
پروگرام کے دوران اختیار ولی خان نے شفیع جان کے مؤقف پر شدید ردِعمل دیتے ہوئے کہا، “لعنت ہو تمہاری گندی سیاست پر”۔ ان کا کہنا تھا کہ شفیع جان کی گفتگو سے ایسا محسوس ہوتا ہے جیسے انہیں پشتون عوام کے دکھ درد کا احساس ہی نہیں۔ اختیار ولی نے الزام عائد کیا کہ بعض سیاسی عناصر عمران خان کی سیاست میں اس قدر الجھے ہوئے ہیں کہ انہیں عوامی مسائل دیکھنے کی فرصت نہیں۔
اختیار ولی خان نے مزید کہا کہ “آپ لوگوں کو عمران سے فرصت نہیں، آپ کو عشقِ عمران سے فرصت نہیں ہے، آپ عوام کی کیا خدمت کریں گے جبکہ لوگ مر رہے ہیں”۔ ان کے مطابق تیراہ میں انسانی جانوں کا ضیاع ہو رہا ہے اور ایسے میں سیاسی پوائنٹ اسکورنگ ناقابلِ قبول ہے۔
اس کے جواب میں شفیع جان نے تمام الزامات کو مسترد کرتے ہوئے کہا کہ تیراہ کے عوام کو باقاعدہ طور پر ریسکیو کیا گیا ہے اور ریاستی ادارے صورتحال پر قابو پانے کے لیے متحرک ہیں۔ انہوں نے دعویٰ کیا کہ وہ ذاتی طور پر تیراہ کے عوام کے ساتھ کھڑے ہیں اور ہر فورم پر ان کے مسائل اجاگر کرتے رہے ہیں۔
شفیع جان کا کہنا تھا کہ زمینی حقائق کو نظر انداز کر کے محض تنقید کرنا درست نہیں، جبکہ حکومت اور متعلقہ ادارے اپنی ذمہ داریاں ادا کر رہے ہیں۔ ان کے مطابق تیراہ کے عوام کو تنہا نہیں چھوڑا گیا اور امدادی سرگرمیاں جاری ہیں۔
سیاسی مبصرین کے مطابق اس تلخ مکالمے نے ایک بار پھر یہ سوال کھڑا کر دیا ہے کہ آیا قومی سلامتی اور انسانی بحران جیسے حساس معاملات پر سیاست دان متحد ہو سکیں گے یا سیاسی اختلافات عوامی مسائل کے حل میں رکاوٹ بنتے رہیں گے۔وادی تیراہ کی صورتحال پر جاری یہ سیاسی کشمکش نہ صرف عوامی تشویش میں اضافہ کر رہی ہے بلکہ سیاسی ماحول کو بھی مزید کشیدہ بنا رہی ہے۔
