چیئرمین وزیراعظم یوتھ پروگرام رانا مشہود احمد خان نے کہا ہے کہ موجودہ عالمی حالات میں توانائی کا بحران صرف پاکستان نہیں بلکہ پوری دنیا کے لیے ایک بڑا چیلنج ہے تاہم حکومت پوری ذمہ داری کے ساتھ اس صورتحال کو سنبھال رہی ہے۔
اپنے ایک بیان میں انہوں نے واضح کیا کہ حکومت کی اولین ترجیح ملک میں ایندھن کی بلا تعطل فراہمی کو یقینی بنانا ہے۔
رانا مشہود کا کہنا تھا کہ حکومت مہنگائی اور عالمی تنازعات کے نتیجے میں عوام کو پیش آنے والی مشکلات سے بخوبی آگاہ ہے، اسی لیے ہر ممکن کوشش کی جا رہی ہے کہ عالمی منڈی کے دباؤ کا بوجھ عوام پر کم سے کم منتقل کیا جائے۔
انہوں نے عوام کو یقین دلاتے ہوئے کہا کہ جیسے ہی عالمی منڈی میں پیٹرولیم مصنوعات کی قیمتوں میں کمی آئے گی، اسی تناسب سے اس کا فائدہ براہِ راست پاکستانی عوام تک پہنچایا جائے گا۔
چیئرمین وزیراعظم یوتھ پروگرام نے اس بات پر زور دیا کہ مشکل حالات میں قوم کا تعاون اور اتحاد ہی حکومت کی سب سے بڑی طاقت ہے، اور انشاء اللہ ہم بحیثیت قوم متحد ہو کر اس مشکل مرحلے سے بھی سرخرو ہو کر نکلیں گے۔
