عمان میں پاکستانی سفارت خانے نے پاسپورٹ خدمات کے حوالے سے اہم تبدیلیاں کرتے ہوئے نیا شیڈول اور فیس اسٹرکچر جاری کر دیا ہے، جس کا اطلاق یکم مئی 2026 سے ہوگا۔ اس اقدام کا مقصد قونصلر خدمات کو بہتر بنانا اور سفارت خانے میں بڑھتے ہوئے رش کو کم کرنا بتایا گیا ہے۔
تفصیلات کے مطابق پاکستانی سفارت خانہ عمان نے اعلان کیا ہے کہ اب شہری پاسپورٹ وصولی کے لیے ہفتے میں اتوار سے جمعرات تک دو مختلف اوقات میں آ سکتے ہیں۔ نیا وقت دوپہر 1 بجے سے 2 بجے تک اور دوسرا سیشن سہ پہر 3 بجے سے 4 بجے تک مقرر کیا گیا ہے۔
سفارت خانے کی ہدایت کے مطابق پاسپورٹ وصول کرتے وقت اصل ٹوکن اور پرانا پاسپورٹ ساتھ لانا لازمی ہوگا، بصورت دیگر دستاویزات جاری نہیں کی جائیں گی۔ حکام نے واضح کیا ہے کہ ان شرائط پر عمل درآمد سختی سے یقینی بنایا جائے گا۔
نئے اعلامیے میں پاسپورٹ فیسوں میں بھی ردوبدل کیا گیا ہے۔ پانچ سالہ مدت کے 36 صفحات والے نارمل پاسپورٹ کی فیس 12 عمانی ریال جبکہ ارجنٹ فیس 19 ریال مقرر کی گئی ہے۔
اسی طرح 10 سالہ مدت کے 36 صفحات والے پاسپورٹ کی فیس 17 ریال سے شروع ہوگی، جو درخواست کی نوعیت کے مطابق بڑھ بھی سکتی ہے۔
یہ بھی پڑھیں : اسٹیو اسمتھ کا پی ایس ایل سے متعلق اہم بیان سامنے آگیا
مزید بتایا گیا ہے کہ پاسپورٹ گم ہونے کی صورت میں سخت جرمانے عائد کیے جائیں گے۔ پہلی بار گمشدگی پر فیس دگنی جبکہ دوسری بار گم ہونے پر فیس چار گنا تک بڑھا دی جائے گی۔ مثال کے طور پر دوسری بار 100 صفحات والے ارجنٹ پاسپورٹ کی فیس 208 عمانی ریال تک پہنچ سکتی ہے۔
اعلامیے کے آخر میں شہریوں کو ہدایت کی گئی ہے کہ وہ مقررہ اوقات کی پابندی کریں تاکہ کسی بھی غیر ضروری تاخیر یا پریشانی سے بچا جا سکے اور خدمات کی فراہمی کو مزید مؤثر بنایا جا سکے۔
