آئندہ مالی سال کے بجٹ سے متعلق سرکاری ملازمین اور پنشنرز کے لیے ایک اہم پیش رفت سامنے آئی ہے، جس میں ممکنہ مالی ریلیف کی توقع ظاہر کی جا رہی ہے۔
ذرائع کے مطابق وفاقی بجٹ 2026-27 کی تیاری اپنے آخری مرحلے میں ہے اور حکومت مہنگائی کے اثرات کم کرنے کے لیے مختلف تجاویز پر غور کر رہی ہے۔
ان تجاویز میں سرکاری ملازمین کی تنخواہوں میں تقریباً 7 فیصد تک اضافہ جبکہ ریٹائرڈ افراد کی پنشن میں 5 فیصد اضافے کی تجویز شامل ہے۔
وزارتِ خزانہ کے حکام کا کہنا ہے کہ فی الحال یہ تمام تجاویز زیرِ غور ہیں اور ان پر حتمی فیصلہ ملک کی معاشی صورتحال اور ریونیو اہداف کو سامنے رکھتے ہوئے کیا جائے گا۔ ابھی تک اس حوالے سے کوئی سرکاری اعلان نہیں کیا گیا۔
دوسری جانب مہنگائی میں مسلسل اضافے نے عوام، خاص طور پر تنخواہ دار طبقے کو شدید متاثر کیا ہے۔ تازہ اعداد و شمار کے مطابق اپریل 2026 میں مہنگائی کی شرح 10.9 فیصد تک پہنچ گئی، جو کہ سرکاری اندازوں سے زیادہ ہے۔
یہ بھی پڑھیں : جنوبی وزیرستان،سیکیورٹی فورسزنےچیک پوسٹ پر خوارج کا حملہ ناکام بنادیا،دھماکے میں14 عام شہری نشانہ بن گئے
اس سے قبل مارچ میں یہ شرح 7.3 فیصد ریکارڈ کی گئی تھی، جبکہ شہری علاقوں میں مہنگائی 11.1 فیصد اور دیہی علاقوں میں 10.6 فیصد رہی۔
بڑھتی ہوئی مہنگائی اور اخراجات کے پیش نظر سرکاری ملازمین اور پنشنرز کی نظریں آئندہ بجٹ پر مرکوز ہیں۔ اگر مجوزہ اضافوں کی منظوری دے دی جاتی ہے تو اس سے لاکھوں افراد کو مالی دباؤ میں کمی کا سامنا ہو سکتا ہے۔
حتمی اعلان بجٹ پیش کیے جانے کے موقع پر متوقع ہے، جہاں حکومت اپنی اقتصادی پالیسی اور ممکنہ ریلیف اقدامات کی تفصیلات جاری کرے گی۔
