سوشل میڈیا پر متحرک پاکستانی صارفین کو سائبر سیکیورٹی اداروں نے ایک ایسے خفیہ اکاؤنٹ سے خبردار کیا ہے جو سطح پر پرو پاکستانی دکھائی دیتا ہے لیکن حقیقت میں انڈین انٹیلی جنس ایجنسی ’را‘ کا مکارانہ طور پر چھپا ہوا ’ٹروجن‘ اکاؤنٹ ہے۔ یہ اکاؤنٹ خود کو وطن پرست اور تنقیدی آواز بنا کر پروپیگنڈا پھیلاتا ہے۔
اتوار کو پاکستانی سوشل میڈیا پر ایک انتہائی بااثر ایکس اکاؤنٹ اُفاق آر ایم Ufaq_RM(جو کہ عائشہ آفاق کے نام سے متحرک ہے) کے حوالے سے ایک بڑا سائبر سیکیورٹی الرٹ جاری کیا گیا ہے۔
طویل عرصے سے خود کو ایک محب وطن اور تنقیدی پاکستانی آواز کے طور پر پیش کرنے والے اس اکاؤنٹ کے ڈیجیٹل فٹ پرنٹ (پرانے ڈیٹا) کی گہری چھان بین سے معلوم ہوتا ہے کہ یہ اکاؤنٹ دراصل ایک مکارانہ چال یعنی ’ٹروجن ہارس‘ آپریشن ہے، جسے مبینہ طور پر بھارتی انٹیلیجنس ایجنسی ’را‘آپریٹ کر رہی ہے۔
پرانے ٹویٹس نے پول کھول دی
اس اکاؤنٹ کا نقاب اس وقت اترا جب ڈیجیٹل تفتیش کاروں نے اس کی ماضی کی سرگرمیوں کا کھوج لگایا۔ موجودہ دور میں پاکستانی قوم پرستی اور سیاسی تجزیوں کا لبادہ اوڑھنے والے اس اکاؤنٹ کا پرانا ریکارڈ بالکل مختلف کہانی بیان کرتا ہے۔
سب سے بڑا ثبوت
26 فروری 2021 کو یعنی بالاکوٹ فضائی جھڑپ کی برسی کے موقع پرانڈین ایئر فورس کے ایئر مارشل پی کے رائے نے پاکستانی فضائی حدود کی خلاف ورزی کی تعریف میں ایک ٹویٹ کیا تھا۔
اکاؤنٹ کا ردعمل
اسی صبح 5:26 بجے، اسی Ufaq_RMاکاؤنٹ سے بھارتی ایئر مارشل کو جواب دیتے ہوئے لکھا گیا، ’They Are Great heroes S sir’ (سر، وہ عظیم ہیرو ہیں)۔
واضح رہے کہ یہ بات انتہائی غیر معمولی اور ناقابلِ یقین ہے کہ کوئی بھی حقیقی پاکستانی صارف اپنے ہی ملک پر حملہ کرنے والی انڈین ایئر فورس کے پائلٹوں کو سرِ عام ’عظیم ہیرو‘ قرار دے اور انہیں سلام پیش کرے۔
سائبر ’ٹروجن‘ کی حکمتِ عملی
اوپن سورس انٹیلیجنس کے اشاروں کے مطابق یہ اکاؤنٹ پاکستانی سوشل میڈیا صارفین کے درمیان جگہ بنانے کے لیے ایک انتہائی چالاک حکمتِ عملی پر عمل پیرا ہے۔
محبِ وطن کا لبادہ
یہ اکاؤنٹ باقاعدگی سے پاکستان کے اندرونی سیاسی معاملات پر بحث کرتا ہے اور خود کو شدید محبِ وطن ظاہر کرتا ہے تاکہ مقامی صارفین کا اعتماد اور بڑی تعداد میں فالوورز حاصل کیے جا سکیں۔
پروپیگنڈا شامل کرنا
ایک بار جب پاکستانی عوام میں اس کی ساکھ بن جاتی ہے، تو یہ اکاؤنٹ بڑی ہوشیاری سے ایسے بیانیے پھیلاتا ہے جو دشمن ملک کے پروپیگنڈے سے میل کھاتے ہیں۔ اس کا مقصد ملک کے اندر انتشار پھیلانا، پولرائزیشن (سیاسی تقسیم) کو بڑھاوا دینا اور بیرونی بیانیے کو سچ ثابت کرنا ہے۔
مبہم لوکیشن (مقام)
اس اکاؤنٹ کے ایکس (ٹویٹر) ٹرانسپیرنسی ڈیٹا میں مقام کو کسی مخصوص ملک کے بجائے مبہم طور پر ’South Asia‘ (جنوبی ایشیا) دکھایا گیا ہے اور یہ ’ساؤتھ ایشیا اینڈرائیڈ ایپ‘ کے ذریعے منسلک ہے۔ یہ طریقہ کار عام طور پر وہ اکاؤنٹس استعمال کرتے ہیں جو اپنے اصل جغرافیائی مقام کو چھپانا چاہتے ہیں۔
سائبر سیکیورٹی ایڈوائزری
سیکیورٹی تجزیہ کاروں اور ڈیجیٹل واچ ڈاگز نے پاکستانی سوشل میڈیا صارفین کو شدید احتیاط برتنے کی ہدایت کی ہے۔ عوام کو مشورہ دیا گیا ہے کہ وہ فوری طور پر ہینڈل Ufaq_RM کو ان فالو، رپورٹ اور بلاک کریں تاکہ خود کو ذہنی اثر و رسوخ اور گمراہ کن بیانیے سے محفوظ رکھ سکیں۔
ہائبرڈ وارفیئر کے اس جدید دور میں ڈیجیٹل شناخت کو باقاعدہ ہتھیار کے طور پر استعمال کیا جا رہا ہے۔ پروفائل پر موجود ‘بلیو ٹک’ یا بائیو میں ‘پاکستانی پرچم’ اس بات کی ضمانت نہیں ہے کہ اس اسکرین کے پیچھے بیٹھا شخص واقعی پاکستانی یا خیر خواہ ہے۔
