ملک میں پیٹرول کی ممکنہ قلت کے خدشات کے پیش نظر تیل کمپنیوں نے حکومت سے فوری مداخلت کا مطالبہ کردیا ہے۔
میڈیا رپورٹس کے مطابق آئل کمپنیز ایڈوائزری کونسل (او سی اے سی) نے حکومت کو آگاہ کیا ہے کہ ملک میں پیٹرول کے ذخائر انتہائی کم سطح پر پہنچ گئے ہیں اور اس وقت صرف تقریباً 15 روز کی ضرورت کے برابر پیٹرول موجود ہے۔
ذرائع کے مطابق وفاقی وزیر توانائی (پیٹرولیم ڈویژن) علی پرویز ملک کے نام 15 جولائی کو بھیجے گئے ایک خط میں او سی اے سی نے پیٹرول کی فراہمی کی صورتحال کو غیر معمولی حد تک سنگین قرار دیا ہے۔
خط میں بتایا گیا ہے کہ ملک میں اس وقت تقریباً 370 ہزار میٹرک ٹن موٹر اسپرٹ (ایم ایس) کا ذخیرہ موجود ہے، جو ملکی ضروریات کے مطابق تقریباً 15 دن کے لیے کافی ہے۔
تیل کمپنیوں کا کہنا ہے کہ درآمدی پیٹرول کی کلیئرنس میں مشکلات کا سامنا ہے، جبکہ اگر تین درآمدی پیٹرول کارگو بروقت نہ پہنچ سکے تو ملک میں پیٹرول کی سپلائی متاثر ہونے کا خدشہ ہے۔
او سی اے سی کے مطابق 66.7 ارب روپے کی عدم ادائیگی کے باعث آئل کمپنیوں کو شدید مالی دباؤ کا سامنا ہے، جبکہ کم ذخائر، درآمدی ایندھن کی کسٹمز کلیئرنس میں تاخیر، طلب میں اضافے اور مالی مشکلات سپلائی میں رکاوٹ کا سبب بن سکتی ہیں۔
تیل کمپنیوں نے حکومت سے مطالبہ کیا ہے کہ صورتحال کو بہتر بنانے کے لیے فوری اقدامات کیے جائیں تاکہ ملک میں پیٹرول کی فراہمی کا سلسلہ بلا تعطل جاری رہ سکے۔
