نیشنل سائبر کرائم انوسٹی گیشن ایجنسی کا نورین نیازی کو نوٹس، 20 جولائی کو طلب کر لیا گیا۔
نیشنل سائبر کرائم انوسٹی گیشن ایجنسی نے بانی پی ٹی آئی کی بہن نورین نیازی کو نوٹس جاری کرتے ہوئے انہیں 20 جولائی کو طلب کر لیا ہے۔
تفصیلات کے مطابق نورین نیازی کو ضابطہ فوجداری کی دفعہ 160 کے تحت نوٹس جاری کیا گیا ہے، جس میں انہیں سائبر کرائم دفتر اسلام آباد میں پیش ہو کر اپنا بیان ریکارڈ کرانے کی ہدایت کی گئی ہے۔
نوٹس کے مطابق نورین نیازی کو 20 جولائی کو دن 12 بجے سیکٹر تھرٹین اسلام آباد میں قائم سائبر کرائم دفتر میں طلب کیا گیا ہے۔ ایجنسی کا کہنا ہے کہ مبینہ طور پر چھوٹی خبر پھیلا کر ریاستی ادارے کو بدنام کرنے کی کوشش کی گئی۔
نوٹس میں مزید کہا گیا ہے کہ طلبی کی تعمیل نہ کرنے کی صورت میں پاکستان پینل کوڈ کی دفعہ 174 کے تحت قانونی کارروائی عمل میں لائی جا سکتی ہے۔
واضح رہے کہ نورین نیازی پر الزام ہے کہ انہوں نے سوشل میڈیا پر ریاستی اداروں کے خلاف مبینہ طور پر جھوٹا اور اشتعال انگیز مواد پھیلایا۔ تاہم اس معاملے پر ان کا مؤقف سامنے نہیں آیا۔
