امریکا اور ایران کے درمیان ممکنہ امن معاہدے اور آبنائے ہرمز کو دوبارہ کھولنے کے حوالے سے مذاکرات میں پیش رفت نہ ہونے کے باعث عالمی مارکیٹ میں خام تیل کی قیمتوں میں ایک بار پھر اضافہ ریکارڈ کیا گیا ہے۔
خبر رساں ادارے رائٹرز کے مطابق منگل کو برینٹ خام تیل کی قیمت بڑھ کر 88.09 ڈالر فی بیرل ہوگئی، جبکہ امریکی خام تیل ویسٹ ٹیکساس انٹرمیڈیٹ کی قیمت 82.52 ڈالر فی بیرل تک پہنچ گئی۔ دونوں قیمتیں 31 جولائی کے بعد بلند ترین سطح پر ہیں۔
عالمی منڈی میں تیل کی قیمتوں میں اضافے کے بعد پاکستان میں بھی پیٹرولیم مصنوعات مہنگی ہونے کے خدشات بڑھ گئے ہیں۔ ملک میں پیٹرولیم مصنوعات کی قیمتیں گزشتہ کئی ہفتوں سے عالمی مارکیٹ کے اتار چڑھاؤ کے مطابق روزانہ کی بنیاد پر طے کی جا رہی ہیں۔
رائٹرز کے مطابق ایک روز قبل بھی خام تیل کی قیمتوں میں تقریباً 5 فیصد اضافہ ہوا تھا۔ مارکیٹ میں تیزی کی بڑی وجہ امریکا اور ایران کے درمیان جاری مذاکرات میں پیدا ہونے والی غیر یقینی صورتحال کو قرار دیا جا رہا ہے۔
رپورٹ کے مطابق امریکی صدر ڈونلڈ ٹرمپ نے ایران کی جانب سے امن معاہدے کے لیے پیش کی گئی شرائط کے جواب میں اپنے مطالبات سامنے رکھے ہیں۔ ٹرمپ نے جنگوں، حملوں اور احتجاج کے دوران ہلاک ہونے والے افراد کے لیے ایران سے معاوضے کا مطالبہ کیا ہے، جس کے باعث آبنائے ہرمز کو دوبارہ کھولنے کی کوششیں مزید پیچیدہ ہونے کا خدشہ پیدا ہوگیا ہے۔
مارکیٹ تجزیہ کار ٹونی سائکامور کا کہنا ہے کہ امریکا اور ایران کے درمیان مذاکرات میں تعطل برقرار رہنے کی صورت میں خام تیل کی قیمت 75 سے 95 ڈالر فی بیرل کے درمیان رہ سکتی ہے۔
آسٹریلیا میں شرح سود برقرار
دوسری جانب آسٹریلیا کے مرکزی بینک نے منگل کو مسلسل دوسری میٹنگ میں شرح سود 4.35 فیصد پر برقرار رکھنے کا فیصلہ کیا ہے۔ تاہم مرکزی بینک نے خبردار کیا ہے کہ اگر افراط زر پر قابو پانے کے لیے ضرورت محسوس ہوئی تو شرح سود میں دوبارہ اضافہ کیا جا سکتا ہے۔
ایشیائی اسٹاک مارکیٹوں میں ملا جلا رجحان
ایشیا کی اسٹاک مارکیٹوں میں بھی منگل کو کاروباری سرگرمیوں کے دوران ملا جلا رجحان دیکھنے میں آیا۔
جاپان کے علاوہ ایشیا پیسیفک اسٹاکس کا وسیع انڈیکس 0.36 فیصد اضافے کے ساتھ بند ہوا، جبکہ جنوبی کوریا کے کوسپی انڈیکس میں 1.3 فیصد اضافہ ریکارڈ کیا گیا۔
ہانگ کانگ کے ہینگ سینگ انڈیکس میں بھی 0.6 فیصد کی بہتری دیکھی گئی، تاہم چین کا سی ایس آئی 300 انڈیکس 0.05 فیصد کمی کا شکار رہا۔
اے آئی انفرااسٹرکچر میں بڑی سرمایہ کاری کی تیاری
عالمی مالیاتی مارکیٹوں میں مصنوعی ذہانت کے شعبے میں ہونے والی بڑی سرمایہ کاری بھی توجہ کا مرکز بنی ہوئی ہے۔
امریکی ٹیکنالوجی کمپنی اینویڈیا نے چھ بڑے مالیاتی اداروں کے ساتھ مل کر اے آئی انفرااسٹرکچر کے لیے 500 ارب ڈالر سے زائد نجی سرمایہ جمع کرنے کے مقصد سے فنانسنگ پلیٹ فارمز شروع کرنے کا اعلان کیا ہے۔
ڈالر کے مقابلے میں ین مزید کمزور
کرنسی مارکیٹ میں جاپانی ین ایک مرتبہ پھر دباؤ کا شکار رہا اور ایک ڈالر کے مقابلے میں 159 کی سطح سے نیچے کمزور ہوا۔
عالمی مارکیٹ میں تیل کی قیمتوں، امریکا ایران مذاکرات، شرح سود اور اے آئی انفرااسٹرکچر میں بڑے پیمانے پر سرمایہ کاری کے باعث آنے والے دنوں میں عالمی مالیاتی منڈیوں میں اتار چڑھاؤ برقرار رہنے کا امکان ظاہر کیا جا رہا ہے۔
