اسلام آباد: حکومت اور پاکستان تحریک انصاف (پی ٹی آئی) کے درمیان مذاکرات کا دوسرا دور آج سہ پہر 3 بجے اسپیکر قومی اسمبلی ایاز صادق کے چیمبر میں ہوگا۔
مذاکرات کے دوسرے دور کے لیے ابتدائی طور پر دوپہر 2 بجے کا وقت مقرر کیا گیا تھا، تاہم اب اس میں تبدیلی کرتے ہوئے وقت 3 بجے کردیا گیا ہے۔
قومی اسمبلی سیکریٹریٹ نے بھی مذاکرات کے دوسرے دور کے انعقاد کی تصدیق کی ہے۔ پہلے دور میں حکومت، پیپلز پارٹی اور اپوزیشن کے نمائندوں نے ملک کی موجودہ سیاسی صورتحال، پی ٹی آئی کے 4 اکتوبر کے مجوزہ مارچ اور دیگر معاملات پر اپنے اپنے مؤقف پیش کیے۔
انشاء اللہ آج سہ پہر 3 بجے اسپیکر قومی اسمبلی کے دفتر میں حکومتی اور اپوزیشن وفود کے درمیان مذاکرات کا دوسرااور اہم راؤنڈ ہوگا pic.twitter.com/9vvN8WvfxR
— Barrister Gohar Khan (@BarristerGohar) October 3, 2026
مذاکرات کے دوران فریقین نے قومی اور سیاسی معاملات کو بات چیت اور باہمی مشاورت کے ذریعے حل کرنے کی ضرورت پر زور دیا، تاہم اہم امور پر کسی حتمی اتفاق رائے کی اطلاع نہیں دی گئی۔
پی ٹی آئی کے مذاکراتی وفد میں بیرسٹر گوہر علی خان، علامہ راجہ ناصر عباس، اسد قیصر، سلمان اکرم راجا، عامر ڈوگر اور حلیم عادل شیخ شامل ہیں، جبکہ حکومتی و اتحادی وفد میں وزیر داخلہ محسن نقوی، رانا ثنا اللہ، طلال چوہدری، امیر مقام، شیری رحمان، نوید قمر اور اعجاز جاکھرانی شامل ہیں۔
یہ بھی پڑھیں : حکومت اور اپوزیشن مذاکرات: پی ٹی آئی کے مطالبات پر واضح حکومتی موقف سامنے آ گیا
پہلے دور کے بعد بیرسٹر گوہر نے مذاکرات کو خوشگوار ماحول میں ہونے والا قرار دیا تھا۔ فریقین نے بات چیت جاری رکھنے پر اتفاق ایسے وقت میں کیا ہے جب پی ٹی آئی نے 4 اکتوبر کو اسلام آباد مارچ کا اعلان کر رکھا ہے۔
دوسرے دور میں دونوں جانب سے اپنے اپنے مطالبات اور مؤقف پر مزید بات چیت متوقع ہے، جبکہ مذاکرات کی پیش رفت آئندہ سیاسی صورتحال کے حوالے سے اہم سمجھی جا رہی ہے۔
