دہشتگردوں کی ہر گھناؤنی چال ناکام، ڈی آئی خان پولیس کے جرأت مندانہ دفاع نے دشمن کو رلا دیا

ڈیرہ اسماعیل خان کے علاقے میں رات گئے دہشت گردوں نے بھاری ہتھیاروں اور بارود سے بھری گاڑی کے ذریعے تھانہ بند کورائی کو نشانہ بنانے کی مذموم کوشش کی، تاہم پولیس اہلکاروں کی بروقت، منظم اور انتہائی مؤثر جوابی کارروائی کے باعث دہشت گرد اپنے ناپاک عزائم میں بری طرح ناکام ہوگئے۔

پولیس ترجمان کے مطابق حملہ آور دہشت گرد جدید اور بھاری ہتھیاروں سے لیس تھے اور انہوں نے تخریب کاری کی غرض سے بارود سے بھری ایک پک اپ گاڑی تھانے کے مرکزی گیٹ سے ٹکرا دی، جس کے نتیجے میں ایک زوردار دھماکا ہوا۔ اس طاقتور دھماکے کی شدت اتنی زیادہ تھی کہ اس سے تھانے کی عمارت کی دیوار اور ملحقہ مسجد کو بھی نقصان پہنچا۔

ترجمان نے مزید بتایا کہ اس اچانک اور شدید حملے کے فوری بعد تھانے میں تعینات پولیس اہلکاروں نے بے مثال مستعدی، پیشہ ورانہ مہارت اور شجاعت کا مظاہرہ کرتے ہوئے فوری طور پر اپنی پوزیشنیں سنبھال لیں اور منظم جوابی کارروائی کا آغاز کر دیا۔

پولیس جوانوں کی اس بروقت اور دلیری پر مبنی مزاحمت نے دہشت گردوں کی پیش قدمی کو مکمل طور پر روک دیا، جس کے باعث حملہ آور بزدلانہ کوشش کے باوجود تھانے کے اندر داخل ہونے یا اس پر قبضہ کرنے میں کامیاب نہ ہوسکے۔

شدید دھماکے اور اندادھند فائرنگ کے باوجود پولیس اہلکار اپنے مورچوں پر ثابت قدم رہے اور پوری جرات کے ساتھ دشمن کا مقابلہ کیا۔ ان کی پیشگی حفاظتی تیاریوں اور فوری ردعمل نے دہشت گردوں کے بڑے تباہ کن منصوبے کو خاک میں ملا دیا۔

یہ بھی پڑھیں : فتنہ الخوارج کے لیے خوف کی علامت بنی کے پی پولیس، انتہائی مطلوب کمانڈر سیف اللہ کو جہنم واصل کر کے عبرت کا نشان بنا دیا

واقعے کی اطلاع ملتے ہی ڈسٹرکٹ پولیس آفیسر (ڈی پی او) ڈیرہ اسماعیل خان فوری طور پر جائے وقوعہ پر پہنچ گئے، جہاں انہوں نے تھانے کی سکیورٹی، حفاظتی انتظامات اور مجموعی صورتحال کا تفصیلی جائزہ لیا۔

اس موقع پر انہوں نے تھانے میں موجود بہادر افسران اور جوانوں سے ملاقات کر کے حملے کی تمام تفصیلات معلوم کیں اور ان کے عزم کو سراہا۔

دوسری جانب حملے کی ہولناک آواز سنتے ہی مقامی شہری بھی بڑی تعداد میں پولیس کے ساتھ یکجہتی کے لیے تھانے کے قریب پہنچ گئے۔ اہل علاقہ کی جانب سے پولیس فورس کے ساتھ بھرپور تعاون اور اعتماد کا یہ مظہر اس بات کا واضح ثبوت ہے کہ دہشت گردی کے ناسور کے خلاف پولیس اور عام عوام ایک ہی صف میں کھڑے ہیں۔

پولیس حکام کا کہنا ہے کہ تھانہ بند کورائی پر ہونے والے اس حملے کے دوران پولیس جوانوں نے جس غیر معمولی جرأت اور پروفیشنلزم کا مظاہرہ کیا ہے، وہ پوری فورس کے لیے فخر کا باعث ہے۔

پولیس فورس دہشت گردوں کے خلاف آہنی دیوار بنی ہوئی ہے اور عوام کے تعاون سے ملک و قوم کے امن و امان کو برقرار رکھنے کے لیے اس طرح کی تمام کارروائیوں کا بھرپور اور منہ توڑ جواب جاری رکھا جائے گا۔

Scroll to Top