خطے کی تیزی سے بدلتی ہوئی سیاسی اور سکیورٹی صورتحال کے درمیان وفاقی دارالحکومت اسلام آباد ایک بار پھر اہم سفارتی سرگرمیوں کا مرکز بن گیا ہے۔
وفاقی وزیر داخلہ محسن نقوی اور ایران کے وزیر خارجہ عباس عراقچی کے درمیان ہونے والی انتہائی اہم ملاقات نے خطے میں امن و استحکام اور باہمی تعلقات کے حوالے سے نئی راہیں ہموار کر دی ہیں جہاں تہران نے اسلام آباد کے ثالثی اور مصالحانہ کردار کو کھل کر سراہا ہے۔
وفاقی وزیر داخلہ محسن نقوی سے ایرانی وزیر خارجہ عباس عراقچی نے اسلام آباد میں خصوصی ملاقات کی جس میں پاک ایران دوطرفہ تعلقات کے مزید فروغ، باہمی اشتراک کار کو وسعت دینے اور خطے کو درپیش چیلنجز پر تفصیلی مشاورت کی گئی۔
سرکاری اعلامیے کے مطابق اس اہم نشست میں خطے کی تازہ ترین صورتحال اور علاقائی امن و استحکام کو برقرار رکھنے کے لیے مشترکہ اقدامات اٹھانے پر زور دیا گیا۔
ایرانی وزیر خارجہ عباس عراقچی نے خطے میں جاری کشیدگی کو کم کرنے اور تنازعات کو بات چیت کے ذریعے حل کرنے کے لیے پاکستان کی جانب سے ادا کیے جانے والے مثبت اور تعمیری کردار کو بھرپور انداز میں سراہا۔
ملاقات کے دوران وفاقی وزیر داخلہ محسن نقوی نے واضح کیا کہ پاکستان خطے میں پائیدار امن کا خواہاں ہے اور فریقین کے درمیان تنازعات کے پرامن حل کے لیے سفارتی محاذ پر اپنی مخلصانہ کاوشیں ہر صورت جاری رکھے گا۔
یہ بھی پڑھیں : 30 واں ای سی او وزارتی اجلاس اختتام پذیر: تنہائی کا بیانیہ دفن، سفارت کاری کی بڑی جیت پاکستان کے نام
اس موقع پر ایرانی وزیر خارجہ عباس عراقچی نے دونوں ہمسایہ ممالک کے درمیان گہرے روابط کا ذکر کرتے ہوئے کہا کہ ایران پاکستان کے ساتھ اپنے تعلقات کو غیر معمولی اور خصوصی اہمیت دیتا ہے۔
دورہ اسلام آباد کے اختتام پر وفاقی وزیر داخلہ محسن نقوی خود ایئرپورٹ پہنچے اور ایرانی وزیر خارجہ عباس عراقچی کو انتہائی گرمجوشی اور روایتی اخلاق کے ساتھ الوداع کیا۔





