امریکی صدر ڈونلڈ ٹرمپ، چینی صدر شی جن پنگ اور روسی صدر ولادیمیر پیوٹن کے درمیان ہونے والی تاریخی ملاقات کے محض چند گھنٹوں بعد روس نے یوکرین پر ایک بڑا اور ہمہ گیر فضائی حملہ کرتے ہوئے 400 سے زائد ڈرونز اور 110 سے زیادہ میزائل داغ دیئے جس کے نتیجے میں 8 افراد ہلاک اور 28 زخمی ہو گئے جبکہ دارالحکومت کیف میں غیر ملکی سفارت خانوں کو بھی نقصان پہنچا ہے۔
برطانوی نشریاتی اداروں اور بین الاقوامی میڈیا رپورٹس کے مطابق روس کی جانب سے کیے جانے والے اس شدید حملے میں 27 بیلسٹک میزائل بھی داغے گئے جنہوں نے یوکرین کے مختلف حصوں میں تباہی مچا دی۔
یہ حملہ ایک ایسے وقت میں سامنے آیا ہے جب چند ہی گھنٹے قبل تینوں عالمی طاقتوں کے سربراہان کی اہم ملاقات ہوئی تھی جس میں چینی صدر شی جن پنگ نے جوہری ہتھیاروں کے خاتمے اور ان پر مکمل پابندی عائد کرنے پر زور دیا تھا۔
یوکرینی حکام کا کہنا ہے کہ روسی افواج نے دارالحکومت کیف سمیت ملک کے 9 مختلف علاقوں کو نشانہ بنایا۔
شدید گولہ باری اور میزائل حملوں کی زد میں آ کر کیف میں واقع آسٹریا اور نیدرلینڈز کے سفارت خانے بھی متاثر ہوئے ہیں جبکہ 8 شہری جان کی بازی ہار گئے اور 28 افراد زخمی ہوئے جنہیں اسپتالوں میں منتقل کر دیا گیا ہے۔
ادھر اس حملے کے اثرات پڑوسی ملک تک بھی محسوس کیے گئے اور میڈیا رپورٹس کے مطابق پولینڈ نے روس پر الزام عائد کیا ہے کہ کارروائی کے دوران اس کی فضائی حدود کی خلاف ورزی کی گئی۔
دوسری جانب یورپی سطح پر اس صورتحال پر شدید ردعمل سامنے آیا ہے۔
یہ بھی پڑھیں : پشاور میں توانائی شعبے کا اہم اجلاس: مائیکرو ہائیڈل پاور پلانٹس کے نقصانات روکنے اور منافع بڑھانے پر خصوصی بریفنگ
فرانسیسی وزیر خارجہ نے یوکرین کی بگڑتی ہوئی صورتحال پر اقوام متحدہ کی سلامتی کونسل کا ہنگامی اجلاس فوری طور پر بلانے کا مطالبہ کر دیا ہے۔
انہوں نے دوٹوک الفاظ میں کہا کہ عالمی برادری خاموش نہیں رہ سکتی اور روس کو ان حملوں کا ہر صورت حساب اور جواب دینا ہوگا۔





