وفاقی حکومت نے عوام کو مہنگائی سے ریلیف دینے کے لیے بڑا فیصلہ کرتے ہوئے ساڑھے 3 لاکھ ٹن چینی کی درآمد پر تمام ٹیکسز اور ڈیوٹیز ختم کرنے کا اعلان کر دیا ہے۔ اس فیصلے کا مقصد ملک میں چینی کی ممکنہ قلت کو روکنا اور قیمتوں کو کنٹرول میں رکھنا ہے۔
نجی ٹی وی چینل (جیوز نیوز)کے مطابق یہ فیصلہ وفاقی وزیر برائے قومی غذائی تحفظ و تحقیق رانا تنویر حسین کی زیر صدارت ہونے والے اسٹیئرنگ کمیٹی کے اہم اجلاس میں کیا گیا، جس میں چینی کی دستیابی، معیار، قیمتوں میں استحکام اور درآمدی حکمتِ عملی پر تفصیلی مشاورت کی گئی۔
چینی درآمد کا طریقہ کار
اجلاس میں طے کیا گیا کہ چینی کی درآمد ٹریڈنگ کارپوریشن آف پاکستان (ٹی سی پی) کے ذریعے کی جائے گی تاکہ شفافیت، معیار اور حکومتی کنٹرول کو یقینی بنایا جا سکے۔ درآمدی عمل دو مرحلوں میں مکمل کیا جائے گا۔
پہلے مرحلے میں 2 لاکھ ٹن چینی
دوسرے مرحلے میں 1.5 لاکھ ٹن چینی کے لیے ٹینڈر جاری کیا جائے گا۔
قیمتوں میں استحکام اور عوامی ریلیف
حکومت کا کہنا ہے کہ یہ فیصلہ چینی کی قیمتوں میں غیر ضروری اضافے کو روکنے اور مارکیٹ میں توازن برقرار رکھنے کے لیے کیا گیا ہے۔ درآمدی ٹیکسز اور ڈیوٹیز سے مکمل استثنیٰ دینے سے چینی سستی ہو کر صارفین تک پہنچنے کی توقع ہے۔
رانا تنویر حسین نے اجلاس میں کہا کہ حکومت چینی کی فراہمی، معیار اور قیمت پر کوئی سمجھوتہ نہیں کرے گی، اور یہ اقدام صرف وقتی نہیں بلکہ عوامی مفاد میں ایک مستقل حکمت عملی کا حصہ ہے۔
