چیف جسٹس آف پاکستان جسٹس یحییٰ آفریدی کی سربراہی میں سپریم جوڈیشل کونسل کا اہم اجلاس منعقد ہوا، جس میں ججز کے خلاف دائر 24 شکایات کا تفصیلی جائزہ لیا گیا۔
نجی ٹی وی چینل (دنیا نیوز)کے مطابق اجلاس کے دوران کونسل نے 19 شکایات کو متفقہ طور پر خارج کر دیا جبکہ 5 شکایات کو مؤخر کر دیا گیا۔اجلاس میں جسٹس منصور علی شاہ، جسٹس منیب اختر، جسٹس عالیہ نیلم اور جسٹس جنید غفار نے شرکت کی، جبکہ جسٹس منصور علی شاہ ویڈیو لنک کے ذریعے شریک ہوئے۔
سپریم جوڈیشل کونسل کے اعلامیے کے مطابق اجلاس میں سپریم جوڈیشل کونسل سیکرٹریٹ سروس رولز 2025 کے مسودے کی منظوری دے دی گئی۔ اعلامیے میں یہ بھی کہا گیا کہ ضابطہ اخلاق میں ترامیم پر مزید قانونی مشاورت کی ضرورت ہے جبکہ انکوائری کے طریقہ کار سے متعلق بھی مزید غور کیا جائے گا۔
ذرائع کے مطابق اجلاس کے دوران ان ججز کے نام عام کرنے کی تجویز بھی زیر غور آئی جن کے خلاف شکایات نمٹا دی گئی ہیں، تاہم یہ تجویز مسترد کر دی گئی اور فیصلہ کیا گیا کہ ناموں کو فی الحال منظرعام پر نہ لایا جائے۔
سپریم جوڈیشل کونسل نے آئین کے آرٹیکل 209 کے تحت دائر شکایات کا جائزہ لیتے ہوئے شفافیت اور قانون کے دائرے میں رہتے ہوئے فیصلہ سازی کی یقین دہانی کرائی ہے۔
