فیلڈ مارشل سید عاصم منیر نے کہا ہےکہ خیبر پختونخوا کو دہشت گردوں اور ان کے سہولت کاروں سے پاک کیا جائے گا۔
آئی ایس پی آر کے مطابق پشاور میں قبائلی عمائدین کے جرگے سے خطاب کرتے ہوئے فیلڈ مارشل سید عاصم منیر نے کہا کہ پاکستان اپنے تمام ہمسایوں سے امن چاہتا ہے، لیکن افغانستان کی سرزمین سے پاکستان کے خلاف دہشت گردی برداشت نہیں کی جائے گی۔
انہوں نے کہا کہ پاکستان نے افغانستان کے ساتھ تعلقات بہتر بنانے کے لیے متعدد کوششیں کیں، تاہم افغان طالبان حکومت نے بھارتی حمایت یافتہ گروہوں کو سہولت فراہم کی۔
فیلڈمارشل نے یقین دہانی کرائی کہ خیبر پختونخوا کو دہشت گردوں اور ان کے سہولت کاروں سے مکمل طور پر پاک کیا جائے گا۔
قبائلی عمائدین نے دہشت گردی اور افغان طالبان کے خلاف سیکیورٹی فورسز کی مکمل حمایت کا اعادہ کیا اور کہا کہ فتنہ الخوارج اور فتنہ الہندستان کی گمراہ کن سوچ کو قبائل میں کوئی پذیرائی نہیں۔
سید عاصم منیر نے قبائلی عوام کی قربانیوں اور عزم کو خراج تحسین پیش کیا۔
فیلڈ مارشل کی آمد پر کمانڈر پشاور کور نے ان کا استقبال کیا۔انھیں ہیڈکوارٹر الیون کور میں موجودہ سیکیورٹی صورتحال، آپریشنل تیاریوں اور سرحدی امور پر بریفنگ دی گئی۔
