پنجگور، سکیورٹی فورسز کی کارروائی، بی ایل اے کا انتہائی مطلوب کمانڈر فاروق ساتھیوں سمیت ہلاک
تفصیلات کے مطابق بلوچستان کے ضلع پنجگور کے علاقے پروم میں سکیورٹی فورسز نے کارروائی کرتے ہوئے کالعدم تنظیم بلوچستان لبریشن آرمی (بی ایل اے) کے انتہائی مطلوب دہشتگرد فاروق المعروف سورو کو اس کے ساتھیوں سمیت ہلاک کر دیا۔
ذرائع کے مطابق یہ کارروائی فرنٹیئر کور (ایف سی) کی جانب سے کی گئی، جس کے دوران دہشتگردوں کے خلاف بروقت اور مؤثر ایکشن لیا گیا۔ سکیورٹی حکام کا کہنا ہے کہ علاقے میں کلیئرنس آپریشن مکمل کر لیا گیا ہے اور صورتحال مکمل طور پر قابو میں ہے۔
فاروق سورو کا شمار بی ایل اے کے سب سے خطرناک دہشت گردوں میں ہوتا تھا اور وہ متعدد حملوں اور دہشت گردانہ کارروائیوں میں ملوث رہا ہے۔ ایف سی ساؤتھ کی بروقت کارروائی کے نتیجے میں دہشت گرد کی ہلاکت عمل میں آئی، جسے سکیورٹی فورسز کی ایک بڑی کامیابی قرار دیا جا رہا ہے۔
سکیورٹی فورسز نے علاقے میں مکمل کنٹرول برقرار رکھا اور فاروق سورو کے ہمراہ دیگر ملزمان کی گرفتاری یا ہلاکت کے حوالے سے تفتیش بھی جاری ہے۔ یہ کارروائی بی ایل اے کی تنظیمی کارروائیوں پر سنگین اثر ڈالنے کے مترادف سمجھی جا رہی ہے۔
علاقائی سکیورٹی حکام نے شہریوں سے اپیل کی ہے کہ وہ مکمل تعاون کریں اور کسی بھی مشکوک سرگرمی کی صورت میں فوری اطلاع دیں تاکہ علاقے میں امن قائم رکھا جا سکے۔
