امریکی سینٹرل کمانڈ (امریکی سینٹرل کمانڈ (سینٹکام)) نے خلیجِ عمان میں ایرانی پرچم بردار جہاز پر کارروائی کی ویڈیو جاری کر دی ہے، جس کے بعد خطے میں کشیدگی مزید بڑھ گئی ہے۔
سینٹکام کے مطابق امریکی میرینز نے کارروائی کرتے ہوئے جہاز کو تحویل میں لے لیا ہے، اور اس وقت جہاز امریکی کنٹرول میں ہے۔ حکام کا کہنا ہے کہ یہ کارروائی اس وقت کی گئی جب جہاز نے مبینہ طور پر دی گئی وارننگز کو نظرانداز کیا۔
— U.S. Central Command (@CENTCOM) April 19, 2026
عالمی میرین ٹریکنگ ڈیٹا کے مطابق مذکورہ جہاز، جسے ایم وی توسکا (MV Touska) کے نام سے شناخت کیا گیا ہے، ایک کنٹینر شپ ہے جو ایرانی پرچم کے تحت رجسٹرڈ ہے۔
رپورٹ کے مطابق واقعے سے چند گھنٹے قبل جہاز کی رفتار انتہائی کم ہو کر تقریباً 1.2 ناٹس ریکارڈ کی گئی تھی، جو غیر معمولی سمجھی جا رہی ہے۔
اس سے قبل امریکی صدر ڈونلڈ ٹرمپ نے سوشل میڈیا پر بیان دیتے ہوئے کہا تھا کہ امریکی فوج نے ایک ایسے ایرانی بحری جہاز کو روک کر تحویل میں لیا ہے جو آبنائے ہرمز میں مبینہ ناکہ بندی کی خلاف ورزی کی کوشش کر رہا تھا۔
انہوں نے دعویٰ کیا کہ “توسکا” نامی اس جہاز نے امریکی وارننگ کے باوجود اپنا راستہ تبدیل نہیں کیا، جس کے بعد کارروائی کی گئی۔ ٹرمپ کے مطابق یہ جہاز تقریباً 900 فٹ لمبا ہے اور جسامت میں ایک طیارہ بردار بحری جہاز کے برابر ہے۔
یہ بھی پڑھیں : امریکی ناکہ بندی کی خلاف ورزی کرنےکی کوشش پر ایرانی جہاز کو قبضےمیں لےلیا، امریکی صدر
رپورٹس کے مطابق امریکی بحریہ کے گائیڈڈ میزائل ڈسٹرائر نے خلیجِ عمان میں جہاز کو روکا اور اسے رکنے کی وارننگ دی، تاہم عملے کی جانب سے مبینہ طور پر عدم تعاون کے بعد کارروائی کی گئی۔ بعد ازاں جہاز کے انجن روم کو نشانہ بنا کر اسے روکا گیا۔
امریکی حکام کے مطابق جہاز پر موجود عملے کو قابو میں لے کر میرینز نے مکمل کنٹرول حاصل کر لیا ہے اور اس وقت جہاز کے اندر موجود مواد اور سرگرمیوں کی جانچ پڑتال کی جا رہی ہے۔
واقعے کے بعد خطے میں کشیدگی بڑھنے کے خدشات ظاہر کیے جا رہے ہیں، جبکہ بین الاقوامی سطح پر اس پیش رفت پر مختلف ردعمل سامنے آنے کا امکان ہے۔
