سینئر صحافی انس ملک نے ایران کے حالیہ سفارتی بیان سے متعلق اہم وضاحت پیش کرتے ہوئے کہا ہے کہ وزارتِ خارجہ کے ترجمان کے بیان کو مختلف پلیٹ فارمز پر سیاق و سباق سے ہٹ کر پیش کیا جا رہا ہے، جس سے غلط فہمیاں جنم لے رہی ہیں۔
سفارتی حلقوں کے مطابق ایران کے ترجمان نے اپنے بیان میں واضح طور پر کہا تھا کہ “فی الحال مزید مذاکرات کا کوئی منصوبہ نہیں ہے”، جس میں خاص طور پر “فی الحال (YET)” کے لفظ کو اہم قرار دیا جا رہا ہے۔
ماہرین کا کہنا ہے کہ اس لفظ کا مطلب مکمل انکار یا مذاکرات سے مستقل دستبرداری نہیں ہے، بلکہ یہ موجودہ حالات کی عکاسی کرتا ہے۔ یعنی ایران نے مذاکراتی دروازے مکمل طور پر بند نہیں کیے، تاہم فی الحال دوسرے دور کی کوئی فوری پیش رفت موجود نہیں ہے۔
سفارتی تجزیہ کاروں کے مطابق بین الاقوامی بیانات اکثر وقتی سیاسی اور سفارتی حالات کے تحت دیے جاتے ہیں، جنہیں حتمی یا مستقل مؤقف کے طور پر نہیں لیا جاتا۔
یاد رہے کہ مختلف میڈیا پلیٹ فارمز پر اس بیان کی مختلف تشریحات سامنے آنے کے بعد اب اصل مؤقف پر توجہ دینے کی ضرورت پر زور دیا جا رہا ہے، جبکہ “فی الحال” کے لفظ نے صورتحال کو مزید واضح کر دیا ہے کہ معاملہ مکمل طور پر بند نہیں ہوا بلکہ وقتی طور پر تعطل کا شکار ہے۔
