شہزاد نوید
سوات کے علاقے سیدو شریف میں منشیات کے عادی ایک زیر علاج مریض نے مبینہ طور پر خودکشی کر لی ہے جس کے بعد ہسپتال میں حالات کشیدہ ہو گئے۔
واقعے کے فوراً بعد مرکز میں موجود نشے کے دیگر عادی افراد نے شدید احتجاج کیا اور ہسپتال کے دروازے اور شیشے توڑ دیے۔
ہسپتال میں توڑ پھوڑ اور ہنگامہ آرائی کا فائدہ اٹھاتے ہوئے مرکز سے 20 سے زائد نشے کے عادی افراد فرار ہونے میں بھی کامیاب ہو گئے۔
پولیس کے مطابق جاں بحق ہونے والے شخص کا تعلق شانگلہ سے تھا جو کہ ان دنوں بحرین سوات میں رہائش پذیر تھا۔
واقعے کی اطلاع ملتے ہی پولیس کی بھاری نفری موقع پر پہنچ گئی اور صورتحال کو قابو میں کرتے ہوئے تحقیقات کا آغاز کر دیا۔
پولیس حکام کا کہنا ہے کہ مبینہ خودکشی اور ہنگامہ آرائی کے تمام پہلوؤں کا جائزہ لیا جا رہا ہے اور فرار ہونے والے افراد کی تلاش جاری ہے۔
