ہائر ایجوکیشن کمیشن (ایچ ای سی) نے ملک بھر کے طلبا اور گریجویٹس کے لیے ایک بڑے ریلیف کا اعلان کرتے ہوئے ڈگری اٹیسٹیشن کے نظام کو مکمل طور پر آن لائن اور پیپر لیس کر دیا ہے۔ اس نئے اقدام کا مقصد ڈگریوں کی تصدیق کے عمل کو آسان، تیز رفتار اور شفاف بنانا ہے۔
ایچ ای سی کے اعلامیے کے مطابق، ڈگری تصدیقی سروس اب 24 گھنٹے آن لائن دستیاب ہوگی۔ درخواست گزار کسی بھی وقت پورٹل کے ذریعے اپنی درخواست جمع کرا سکیں گے، جس سے اب دفاتر کے چکر کاٹنے اور لمبی لائنوں میں لگنے کی ضرورت نہیں رہے گی۔
نئے ڈیجیٹل نظام کی سب سے بڑی سہولت یہ ہے کہ اب طلبا کو تصدیق کے لیے اصل اسناد ساتھ لے جانے کی ضرورت نہیں ہوگی۔ تصدیقی عمل کو اب مکمل طور پر ڈیجیٹل ویریفکیشن پر منتقل کر دیا گیا ہے، جہاں سسٹم کے ذریعے ہی اسناد کے کوائف کی جانچ پڑتال کی جائے گی۔
کمیشن کا کہنا ہے کہ اٹیسٹڈ ڈگری کی آن لائن تصدیق کا فیچر بھی متعارف کرا دیا گیا ہے، جس سے آجر (Employers) اور دیگر ادارے فوری طور پر ڈگری کی اصلیت جان سکیں گے۔ اس سے نہ صرف وقت کی بچت ہوگی بلکہ جعلی سازی کے امکانات بھی ختم ہو جائیں گے۔
واضح رہے کہ ایچ ای سی کا یہ جدید ای اٹیسٹیشن نظام 11 مئی 2026 سے ملک بھر میں نافذ العمل ہو چکا ہے۔ یہ اقدام حکومت کے ڈیجیٹل پاکستان ویژن کا حصہ ہے تاکہ اعلیٰ تعلیم یافتہ نوجوانوں کو سرکاری خدمات تک آسان رسائی دی جا سکے۔
