عبداللہ مدنی
لوئر دیر کے صدر مقام تیمرگرہ کے علاقے تالاش بازار میں تیز رفتار ڈائنا گاڑی کی ٹکر سے موٹر سائیکل سوار ایک نوجوان جاں بحق ہو گیا جبکہ حادثے کے بعد گاڑی کا ڈرائیور موقع سے فرار ہونے میں کامیاب ہو گیا۔
ذرائع کے مطابق زیارت تالاش کے مصروف بازار میں چکدرہ سے تیمرگرہ آنے والی ایک تیز رفتار ڈائنا گاڑی نے موٹر سائیکل کو زوردار ٹکر مار دی، جس کے نتیجے میں موٹر سائیکل پر سوار فرسٹ ایئر کا طالب علم محمد سنان خان ولد طارق خان (سکنہ سرائے پایان تالاش) سڑک پر گر کر موقع پر ہی دم توڑ گیا۔
یہ بھی پڑھیں : لوئر دیر،کمسن بچے سے زیادتی کے جرم میں امام مسجد کو 21 سال قید کی سزا
واقعے کی اطلاع ملتے ہی پولیس نے لاش کو تحویل میں لے کر ضروری قانونی کارروائی کے بعد ورثاء کے حوالے کر دیا اور نامعلوم ڈرائیور کے خلاف مقدمہ درج کر کے اس کی تلاش شروع کر دی ہے۔
واضح رہے کہ لوئر دیر میں گزشتہ چھ دنوں کے دوران دریا میں ڈوبنے اور مختلف ٹریفک حادثات کے نتیجے میں اب تک 13 افراد جان کی بازی ہار چکے ہیں جن میں اکثریت نوجوانوں کی ہے۔
