اسلام آباد: وفاقی دارالحکومت کے شہریوں کیلئے سرکاری خدمات تک رسائی مزید آسان بنانے کے لیے نیشنل آئی ٹی بورڈ نے جدید موبائل ایپلی کیشن ’پاک ایپ‘ متعارف کرا دی ہے، جس کے ذریعے مختلف سرکاری اداروں کی متعدد سہولیات ایک ہی ڈیجیٹل پلیٹ فارم پر دستیاب ہوں گی۔
نیشنل آئی ٹی بورڈ کے مطابق ’پاک ایپ‘ کو پاکستان آسان خدمت کے تصور کے تحت تیار کیا گیا ہے، جس کا مقصد شہریوں اور سرکاری اداروں کے درمیان رابطے کو مؤثر بنانا اور عوام کو تیز، آسان اور جدید سہولیات فراہم کرنا ہے۔
حکام کا کہنا ہے کہ نئی ایپ کے ذریعے اسلام آباد کے شہری مختلف سرکاری خدمات اور سہولتوں تک ایک مربوط نظام کے تحت رسائی حاصل کر سکیں گے، جس سے روایتی اور وقت طلب طریقہ کار پر انحصار کم ہوگا۔
نیشنل آئی ٹی بورڈ کے مطابق ایپ کو جدید یوزر انٹرفیس اور صارف دوست ڈیزائن کے ساتھ تیار کیا گیا ہے۔ اس میں آسان نیوی گیشن، بہتر کارکردگی اور جدید فیچرز شامل کیے گئے ہیں تاکہ ہر عمر کے افراد باآسانی اس سے استفادہ کر سکیں۔
حکام نے بتایا کہ ’پاک ایپ‘ کے ذریعے شہریوں کو مختلف سرکاری خدمات کیلئے الگ الگ ویب سائٹس یا پلیٹ فارمز استعمال کرنے کی ضرورت نہیں رہے گی، بلکہ متعدد سہولتیں ایک ہی جگہ دستیاب ہوں گی۔
یہ بھی پڑھیں : عراق جانے والے پاکستانی زائرین کیلئے بڑا اعلان
اس اقدام کو حکومت کے ڈیجیٹل پاکستان وژن کا اہم حصہ قرار دیا جا رہا ہے، جس کا مقصد سرکاری خدمات کی فراہمی کو جدید تقاضوں سے ہم آہنگ کرنا اور عوامی سہولتوں میں اضافہ کرنا ہے۔
نیشنل آئی ٹی بورڈ کا کہنا ہے کہ ایپ کے استعمال سے شہریوں کا وقت بچے گا، سرکاری خدمات کے حصول کا عمل مزید آسان ہوگا اور غیر ضروری مراحل میں بھی کمی آئے گی۔ اس کے ساتھ ساتھ سرکاری اداروں کی کارکردگی اور خدمات کی فراہمی کے نظام میں بھی بہتری متوقع ہے۔
حکام کے مطابق شہری اینڈرائیڈ اور آئی او ایس پلیٹ فارمز کیلئے دستیاب کیو آر کوڈز اسکین کرکے ’پاک ایپ‘ ڈاؤن لوڈ کر سکتے ہیں۔ مستقبل میں اس پلیٹ فارم میں مزید سہولیات شامل کیے جانے کا بھی امکان ہے تاکہ شہریوں کو زیادہ سے زیادہ خدمات ایک ہی جگہ فراہم کی جا سکیں۔
