عالمی مارکیٹ میں خام تیل کی قیمتوں میں مسلسل کمی کے باعث پاکستان میں بھی پٹرولیم مصنوعات کی قیمتوں میں نمایاں کمی کی توقع پیدا ہوگئی ہے۔
ذرائع کے مطابق حکومت آئندہ قیمتوں کے تعین میں عوام کو بڑا ریلیف دینے پر غور کر رہی ہے، جس کے تحت پٹرول اور ہائی اسپیڈ ڈیزل کی قیمتوں میں خاطر خواہ کمی کی جا سکتی ہے۔
پٹرولیم ڈویژن کے ذرائع کا کہنا ہے کہ پٹرول کی فی لٹر قیمت میں 22 روپے تک کمی کی تجویز زیر غور ہے، جبکہ ہائی اسپیڈ ڈیزل کی قیمت 42 روپے فی لٹر تک کم کرنے کی سفارش سامنے آئی ہے۔ اگر یہ تجاویز منظور ہو جاتی ہیں تو ملک بھر میں ٹرانسپورٹ اور صنعتی شعبے کو نمایاں ریلیف مل سکتا ہے۔
ماہرین اقتصادیات کے مطابق پٹرولیم مصنوعات کی قیمتوں میں ممکنہ کمی سے نہ صرف گاڑی مالکان بلکہ عام صارفین کو بھی فائدہ پہنچے گا۔
ٹرانسپورٹ کے اخراجات کم ہونے سے اشیائے خورونوش اور دیگر ضروری سامان کی نقل و حمل سستی ہو سکتی ہے، جس کے نتیجے میں مہنگائی کی مجموعی شرح پر بھی مثبت اثرات مرتب ہونے کا امکان ہے۔
تاہم دوسری جانب ذرائع نے یہ بھی انکشاف کیا ہے کہ حکومت ڈیزل پر عائد پٹرولیم لیوی میں 27 روپے فی لٹر اضافے کی تجویز پر بھی غور کر رہی ہے۔
ماہرین کا کہنا ہے کہ اگر یہ تجویز منظور کر لی گئی تو صارفین کو ملنے والے ممکنہ ریلیف کی شرح متاثر ہو سکتی ہے اور قیمتوں میں متوقع کمی مکمل طور پر منتقل نہیں ہو سکے گی۔
یہ بھی پڑھیں : میثاقِ جمہوریت پر علی محمد خان کا اہم بیان سامنے آگیا
معاشی ماہرین کے مطابق عالمی سطح پر خام تیل کی قیمتوں میں حالیہ گراوٹ کی بنیادی وجہ مشرق وسطیٰ میں کشیدگی میں کمی اور عالمی منڈی میں طلب و رسد کی صورتحال میں بہتری ہے۔ خطے میں حالات معمول پر آنے کے بعد خام تیل کی قیمتوں پر دباؤ کم ہوا ہے جس کے اثرات دنیا بھر کے درآمدی ممالک پر مرتب ہو رہے ہیں۔
عالمی مالیاتی جریدے بلوم برگ کی رپورٹ کے مطابق بین الاقوامی مارکیٹ میں برینٹ کروڈ آئل کی قیمت 74.80 ڈالر فی بیرل تک رہی، تاہم بعد ازاں مزید کمی کے بعد یہ تقریباً 73.8 ڈالر فی بیرل کی سطح تک گر گئی۔
رپورٹ کے مطابق مشرق وسطیٰ میں کشیدگی کے بعد پہلی مرتبہ خام تیل کی قیمت 75 ڈالر فی بیرل سے نیچے آئی ہے، جو فروری کے اواخر میں امریکا، اسرائیل اور ایران کے درمیان بڑھتی کشیدگی سے قبل کی سطح کے قریب سمجھی جا رہی ہے۔
عالمی مارکیٹ میں خام تیل کی قیمتوں میں کمی کا رجحان برقرار رہا تو پاکستان میں آئندہ پندرہ روزہ جائزے کے دوران پٹرولیم مصنوعات کی قیمتوں میں نمایاں کمی کا امکان مزید مضبوط ہو جائے گا، جس سے عوام اور کاروباری شعبے کو خاطر خواہ ریلیف مل سکتا ہے۔
