خیبرپختونخوا کے ضلع صوابی میں ایک افسوسناک ٹریفک حادثے کے نتیجے میں ایک پولیس اہلکار جاں بحق جبکہ چار اہلکار زخمی ہو گئے۔
ریسکیو حکام کے مطابق حادثہ کرنل شیر خان انٹرچینج کے قریب پیش آیا، جہاں پولیس وین کا اچانک ٹائر پھٹ گیا۔ ٹائر پھٹنے کے باعث ڈرائیور گاڑی پر قابو نہ رکھ سکا اور پولیس وین سڑک کنارے موجود درخت سے جا ٹکرائی۔
حادثے کی اطلاع ملتے ہی ریسکیو ٹیمیں موقع پر پہنچ گئیں اور امدادی کارروائیوں کا آغاز کیا۔ ریسکیو اہلکاروں نے زخمی پولیس اہلکاروں کو فوری طبی امداد فراہم کی، جس کے بعد انہیں مزید علاج کے لیے مردان اسپتال منتقل کر دیا گیا۔
حکام کے مطابق حادثے میں ایک پولیس اہلکار زخموں کی تاب نہ لاتے ہوئے دم توڑ گیا، جبکہ دیگر چار زخمی اہلکاروں کا اسپتال میں علاج جاری ہے۔
حادثے کے بعد متعلقہ حکام نے واقعے کی تحقیقات شروع کر دی ہیں تاکہ حادثے کی وجوہات کا مکمل تعین کیا جا سکے۔ ابتدائی طور پر حادثے کی وجہ گاڑی کا ٹائر پھٹنا بتائی جا رہی ہے۔
