حکومت نے کمرشل طیاروں کے لیے استعمال ہونے والے ایندھن جیٹ فیول کی قیمت میں ایک بار پھر اضافہ کردیا ہے، جس کے بعد ہوائی سفر کے اخراجات میں اضافے کا امکان ظاہر کیا جا رہا ہے۔
ذرائع کے مطابق جیٹ فیول کی قیمت میں 40 روپے 35 پیسے فی لیٹر اضافہ کیا گیا ہے، جس کے بعد نئی قیمت 291 روپے 55 پیسے فی لیٹر ہوگئی ہے۔
ذرائع کا کہنا ہے کہ حالیہ اضافے کے بعد گزشتہ دو ہفتوں کے دوران جیٹ فیول کی قیمت میں مجموعی طور پر 53 روپے 58 پیسے فی لیٹر اضافہ ریکارڈ کیا جا چکا ہے۔
ایندھن کی قیمتوں میں اضافے کو ایئر لائنز کے آپریشنل اخراجات میں اضافے کا سبب قرار دیا جا رہا ہے، جس کے باعث مستقبل میں فضائی ٹکٹوں کی قیمتوں پر بھی اثرات مرتب ہونے کا امکان ہے۔
ماہرین کے مطابق جیٹ فیول کی قیمت میں اضافہ عالمی منڈی میں تیل کی قیمتوں، کرنسی ایکسچینج ریٹ اور دیگر معاشی عوامل سے متاثر ہوتا ہے، جبکہ ایئر لائنز اپنے اخراجات کو مدنظر رکھتے ہوئے کرایوں میں ردوبدل کر سکتی ہیں۔
