وادی کالام میں سیاحت کے فروغ، مقامی ثقافت کو اجاگر کرنے اور نوجوان نسل کو تعلیمی و ثقافتی سرگرمیوں سے جوڑنے کے لیے 13 اگست کو خصوصی ٹورازم، ایجوکیشن اینڈ کلچرل نائٹ منعقد کرنے کا فیصلہ کیا گیا ہے۔
تقریب کا مقصد وادی کالام کے قدرتی حسن، سیاحتی مقامات، مقامی روایات اور ثقافتی ورثے کو ملکی و غیر ملکی سیاحوں کے سامنے اجاگر کرنا ہے۔
منتظمین کے مطابق تقریب میں سیاحت، تعلیم اور ثقافت کے مختلف پہلوؤں کو نمایاں کیا جائے گا جبکہ مقامی فنون، روایتی لباس، موسیقی اور دیگر ثقافتی سرگرمیوں کے ذریعے کالام کی منفرد شناخت پیش کی جائے گی۔
تقریب میں مختلف شعبوں سے تعلق رکھنے والی شخصیات، مقامی عمائدین، نوجوانوں، طلبہ، سیاحوں اور سیاحت سے وابستہ افراد کی شرکت متوقع ہے۔
منتظمین کا کہنا ہے کہ وادی کالام قدرتی حسن سے مالا مال ہونے کے ساتھ ساتھ منفرد ثقافتی ورثے کی بھی حامل ہے تاہم سیاحت کے فروغ کے لیے صرف قدرتی مقامات کافی نہیں بلکہ ایسے مثبت اور بامقصد پروگراموں کا انعقاد بھی ضروری ہے جو سیاحوں کو علاقے کی ثقافت، روایات اور طرزِ زندگی سے روشناس کرائیں۔
منتظمین کے مطابق 13 اگست کی نائٹ کو ایک مثبت اور صحت مند سرگرمی کے طور پر منعقد کیا جا رہا ہے جس کے ذریعے کالام کا خوبصورت، پُرامن اور سیاح دوست تشخص اجاگر کرنے کی کوشش کی جائے گی۔
اس موقع پر مقامی نوجوانوں کو اپنی صلاحیتیں پیش کرنے کا موقع بھی ملے گا، جبکہ ثقافتی سرگرمیوں کے ذریعے نئی نسل کو اپنے روایتی ورثے سے جوڑنے میں مدد ملے گی۔
سیاحت سے وابستہ حلقوں نے اس اقدام کو خوش آئند قرار دیتے ہوئے کہا ہے کہ کالام میں ایسے پروگرامز کا انعقاد باقاعدگی سے ہونا چاہیے تاکہ سیاحتی سیزن کے دوران آنے والے ملکی و غیر ملکی سیاحوں کو تفریح کے ساتھ ساتھ علاقے کی ثقافت، روایات اور تاریخی اہمیت سے بھی آگاہ کیا جاسکے۔
یہ بھی پڑھیں: عمان نے 14 روزہ مفت سیاحتی ویزا متعارف کرا دیا
علاقہ مکینوں اور سیاحت سے وابستہ کاروباری افراد کے مطابق اس نوعیت کی سرگرمیوں سے مقامی ہوٹلنگ، ٹرانسپورٹ، ریسٹورنٹس، دستکاری اور دیگر کاروباری شعبوں کو بھی فروغ مل سکتا ہے۔
انہوں نے حکومت اور متعلقہ اداروں سے مطالبہ کیا کہ کالام میں سیاحت کے فروغ کے لیے ثقافتی پروگراموں کے ساتھ ساتھ سڑکوں، صفائی، پارکنگ، بجلی اور دیگر بنیادی سہولیات کی بہتری پر بھی خصوصی توجہ دی جائے۔
13 اگست کو ہونے والی ٹورازم، ایجوکیشن اینڈ کلچرل نائٹ کو کالام میں سیاحت کے فروغ اور مقامی ثقافت کے تحفظ کے حوالے سے ایک اہم قدم قرار دیا جا رہا ہے جس سے علاقے کا مثبت تشخص مزید اجاگر ہونے اور سیاحتی سرگرمیوں کو فروغ ملنے کی توقع ہے۔
