وزیر اطلاعات پنجاب عظمیٰ زاہد بخاری نے وزیراعلیٰ مریم نواز شریف کے لندن دورے کے اخراجات سے متعلق تنقید پر ردعمل دیتے ہوئے کہا ہے کہ وزیراعلیٰ نے روانگی سے قبل ہدایت دی تھی کہ دورے کے تمام اخراجات وہ خود برداشت کریں گی۔
عظمیٰ بخاری کے مطابق سرکاری نظام میں اخراجات کا حتمی تخمینہ دورہ مکمل ہونے کے بعد لگایا جاتا ہے اور چالان کے ذریعے ادائیگی کی جاتی ہے، یہ کوئی ایزی پیسہ یا جاز کیش نہیں کہ سفر ختم ہونے سے پہلے حساب سامنے رکھ دیا جائے۔
انہوں نے کہا کہ لندن دورہ مکمل ہونے سے قبل ہی تنقید اور پروپیگنڈا شروع کردیا گیا۔ عظمیٰ بخاری نے مخالفین کو تنقید کا نشانہ بناتے ہوئے کہا کہ جو خود قوم کے اربوں روپے خرچ کرتے رہے، انہیں دوسروں پر الزامات لگاتے ہوئے شرم آنی چاہیے۔
وزیر اطلاعات پنجاب نے دعویٰ کیا کہ تنقید کرنے والوں کو ایک بار پھر شرمندگی کا سامنا کرنا پڑے گا۔
