وفاقی وزیر توانائی سردار اویس احمد خان لغاری نے محرم الحرام کے مقدس ایام میں مجالس عزاء اور جلوسوں کے دوران بجلی کی بلا تعطل فراہمی کو یقینی بنانے کے لیے ڈسٹری بیوشن کمپنیوں (ڈسکوز) کے چیئرمین اور چیف ایگزیکٹو افسران کو اہم ہدایات جاری کر دی ہیں۔
وزیر توانائی نے واضح کیا کہ محرم الحرام میں ملک بھر میں لاکھوں عزادار مجالس اور جلوسوں میں شریک ہوں گے، اور رواں سال گرمی کی شدت میں اضافے کے پیش نظر بجلی کی بلاتعطل فراہمی کی اشد ضرورت ہے تاکہ عوام کو کسی قسم کی تکلیف نہ ہو۔
تمام خراب آلات کی پیشگی مرمت کی جائے
اویس لغاری نے ہدایت دی کہ تمام ڈسکوز اپنے علاقوں میں موجود خراب یا کمزور الیکٹریکل آلات کی فوری مرمت یا تبدیلی کو یقینی بنائیں۔ انہوں نے کہا کہ قبل از وقت تیاریوں کے بغیر مؤثر خدمات ممکن نہیں، اس لیے تمام اقدامات پیشگی مکمل کیے جائیں۔
ایمرجنسی رسپانس ٹیمیں تعینات کرنے کا حکم
وفاقی وزیر نے تمام ڈسکوز کو ہدایت کی کہ یومِ عاشور کے دوران ہنگامی حالات سے نمٹنے کے لیے ایمرجنسی رسپانس ٹیمیں تشکیل دی جائیں اور انہیں ہائی الرٹ پر رکھا جائے۔ ان ٹیموں کو مقامی ضلعی انتظامیہ، پولیس، اور مذہبی تنظیموں کے ساتھ قریبی رابطے میں رہنے کی بھی ہدایت کی گئی ہے۔
امام بارگاہوں اور مساجد کو پیشگی آگاہی
اویس لغاری نے زور دیا کہ امام بارگاہوں، مساجد اور جلوس کے راستوں پر واقع علاقوں کے صارفین کو کسی بھی شیڈول مرمت یا ممکنہ لوڈ مینجمنٹ کے بارے میں پیشگی آگاہ کیا جائے تاکہ شہری بروقت متبادل انتظامات کر سکیں۔
حساس مقامات پر بیک اپ سسٹمز کی فراہمی
وفاقی وزیر نے حکم دیا کہ حساس مقامات پر اسٹینڈ بائی جنریٹرز، یو پی ایس سسٹمز اور دیگر بیک اپ سہولیات دستیاب رکھی جائیں، تاکہ کسی غیر متوقع فنی خرابی کی صورت میں فوری متبادل بجلی فراہم کی جا سکے۔
24/7 عملہ اور مخصوص کنٹرول سینٹرز قائم کرنے کی ہدایت
اویس لغاری نے کہا کہ تکنیکی اور آپریشنل عملہ چوبیس گھنٹے ڈیوٹی پر موجود رہے، اور تمام ڈسکوز اپنے اپنے علاقوں میں مخصوص کنٹرول سنٹرز قائم کریں تاکہ کسی بھی ایمرجنسی کا بروقت جواب دیا جا سکے۔
کوئی کوتاہی برداشت نہیں ہوگی
انہوں نے واضح کیا کہ اس اہم معاملے میں کسی بھی قسم کی غفلت یا کوتاہی ناقابلِ قبول ہے، اور تمام اقدامات کی تفصیلی رپورٹ پاور ڈویژن کو فراہم کی جائے۔
